माघ २३, काठमाडौं  - साहित्यिक संस्था तामाङ डाजाङको नियमित साहित्यिक कार्यक्रम ‘ग्योईकाई गेताङ’ आज सम्पन्न भएको छ । प्रत्येक महिनाको अन्तिम शनिबार हुने उक्त साहित्यिक कार्यक्रमले यससँगै ८३ औं भाग पूरा गरेको छ ।

कार्यक्रममा सदाझैँ स्रष्टाहरु साम्देन लामा, सोनाम योन्जन, मिनदोर्जे थिङ, अर्जुन पाख्रिन, बाबुलाल स्याङतन, फुल कुमार बम्जन, केआर गोले, ईश्वर थोकर, अटुट दोङ, रिना बम्जनलगायतले तामाङ भाषामा गजल, कविता लगायत आ-आफ्ना रचनाहरु सुनाएका थिए ।

सोही कार्यक्रममा विशेष अतिथिको रुपमा उपस्थित संगीतकार एवं गायक कर्म योन्जनले आफ्ना अनुभवहरु सुनाउँदै तामाङ भाषा र साहित्यको संरक्षण र सम्वर्द्धनमा तामाङ डाजाङले सक्रिय भूमिका खेल्दै आएकोमा प्रशंसा गर्नुभयो । उहाँले जातिको पहिचान नै भाषा भएकोले यसको संरक्षणमा युवाहरु सक्रिय हुन आवश्यक रहेको बताउनुका साथै आफूले आफ्नो तामाङ भाषा बोल्न नसकेकोमा दु:ख व्यक्त गर्नुभयो ।

त्यस्तै तामाङ लोकसम्राट चन्द्र कुमार मोक्तानले आफ्ना अनुभवहरु सुनाउँदै पहिलो तामाङ एल्वमको तामाङ गीत गाएर सुनाउनुभएको थियो । सोही क्रममा उहाँले सांगितिक क्षेत्रमा तामाङहरु निकै अगाडि बढेकोमा गर्वको अनुभूति हुने बताउँदै अन्य क्षेत्र जस्तै: राजनीतिक, शैक्षिक, आर्थिक आदिबाट पनि तामाङहरु यसरीनै माथि उठ्न जरुरी रहेको तर्क राख्नुभयो । कार्यक्रम प्रदर्शनीमार्गस्थित नेपाल मानविकी क्याम्पसमा सम्पन्न भएको थियो ।