कलाकार हृयुलला ग्रेन सम्पत्ति हिन्ना । जम्वुलिङरी मुबा ल्हानान हृयुल्बा गुङरी ह्राङला ल्हो-ल्हो रिमठिम संस्कार सस्कृति मुबा हृयुल्बा हिन्ना तामाङ हृयुल्बा ओम चु न्हाङरी मुबा तामाङ कलाकारकादे । दान्ते चु बैज्ञानिक दुइरी खासी तामाङ ग्योईरी नोन डेढ दर्जन बिमा ल्हामा तामाङ फिल्मकादे तामाङ कादेसे स्होसी जिन्बा मुला । ह्राङलान संस्कार सस्कृति झल्काप ताबा ल्होल्हो बिधारी ल्हानान छयोई स्योस्योकादेजा तिनी बिमा ल्हामान ङ्हाँछाहेन्दे थोन्सी खाबा मुला । थेराङबान संस्कार सस्कृति झल्काप ताबा विधारी दान्ते दोना खामा तामाङ ग्योइरीनोन ल्हाना फिल्मकादे थोन्सी जिन्बामुला । फिल्मलान ताङरी तामाङ फिल्मला तुम्बा काइरणरीन तामाङ हृयुल्बाला ल्होलो काइरन थोसी तुम्बा दिङरीन ल्हामान फिल्म कादे स्होबा जा हृयाङ तामाङला गौरबला ताम हिन्ना । तामाङला चलचित्ररीक्यार च्यामा तामाङ कलाकारजुगुसे जकी हृयाङ तामाङला काइरणदा गिच्छा प्राथामिकता पीन्बा आम्राङ । चलचित्र क्लाङबा वा न नाम्दार ब्रिबा निर्देशक लाबा म्हिकादेसे जा थेराङबा गेलाबा वा दान्ते खासीजा तामाङ चलचित्रकादे ल्हानान थोन्बाला ताङरी मुला । खाइलाबा चलचित्रकादेसे जा ह्राङलान भौगोलिक काई थोसी खामाजा जकी ज्याबा ताला । चु बिमा ङाँछा थोन्बा फिल्मकादेरी जा जकी म्हिला कला फेसन नाम्दारकादेजा नकल लासी ओन्बा वा बिबा ह्राङताई लाबा जिम दारे खाबा फिल्मकादेसे ज्याबा लादोला ह्राङलान भौगोलिक कथा फेसन ओन हाम्तोला । फेसन फिरी ताम लादोमा जा कलाकारला फेसन बिबा थेला गहना हिन्ना । थेराङ लासी कलाकारसे फेसन ओन्दोला फेसन ओन्बारी आताबा स्हे आहिन । तिदा बिसाम नाम्दारला माग अनुसार ओनदोला । आवश्यक्ता बिमा ल्हानाजा ओन्बारी आदा । दात्ते जा कलाकार कादेसे ह्राङला मिन चलप लाबारी आवश्यक्ता बिमा ल्हाना अंगप्रदशन फेसन लाबा म्राङबा मुला । अंगप्रदर्शन फेसन लासी मिनमी चलप ताला तर क्षणिक जेत्खेन ताला । जकी चुरीजा ङादा याखार्गी प्रशङ्ग जोडाब लाई म्हान्जी । चु बिमा ङ्हाँच्छा चलचित्र "च्याङबा" ग्याम फिल्म थुमरी वाङसुबा दात्तेला व्यस्त तामाङ हिरो हिरालाल ब्लोनसे जा चु सिनेम्हेन्दो प्रवेशाङ्करी जा चुराङबा पाङबा मुबा- "ङा हृयाण्डसम आरे ओम ?" हृयाण्डसमला ताम लादोमा हृयाण्डसममी ल्हामान मुला । तर कलाकार हृयाण्डसम जे मुसी आता । थेला हृयाण्डसम बिमा ल्हामा कला तोला । तिदा बिसाम थेसे ह्राङला कला ओन्बारी हामतोला । चु प्रशङ्गजा ङाई नायक हिरालालसे हृयाण्डसम बिबा प्रशङ्गरी थुइबा जे हिन्ना । चु चलचित्र थुमरी ब्राबा सयौ कलाकारकादेसे जा चलचित्र थुमरीन चिसी ह्राङला उत्थान ग्राङतोला । फिल्मरीक्यार जा दात्ते आधुनिक खालला फेसन ओन्बा म्राङबा मुला । हृयाङ तामाङला फिल्मरीजा थेराङबा आधुनिक खालला ज्यार्दि/हिन्दी पाराला फेसन ओन्बारी आताबा ह्राङबा म्राङमुला । तिदा बिसाम थेराङबा फेसन शो लामाल्छे हृयाङला काइरण म्हाला थेराङ लासी हृयाङसे हृयाङलान फेसन ओनहाम्तोला हृयाङला फिल्म थुमसे नोन हृयाङला काइरण सोना लादोला । अंगप्रदर्शन फेशन बिबा जा फिल्मला माग हिन्ना । फिल्मला माग बिबा ल्हाना अंगप्रदर्शन फेसन ओन्बारीजा आदा । हृयाङला चलचित्ररीक्यार हृयाङला काइरण ओनहाम्तोला । जामा जे तामाङ फिल्मला दर्शक ल्हाना ताला । खालि अंगप्रदर्शन/फेसन जे लासी फिल्म चलप आता । फेसनला छ्याम-छ्यामरी हृयाङ तामाङला सजिव चित्रन ओन हाम्तोला । फिल्म स्होबा म्हिकादेसेजा दारे जोराङबा चलचित्र स्हो हाम्तोला थेरी हृयाङला रितिरिवाज आन्तोला । हृयाङ तामाङला सक्कल कला ओन्तोला । कलाकार बिबा हृयाङला जे आम्हान्ना क्योनोन हृयुल्बाला सम्पति म्हान्तोला । हृवाइरी क्यार स्यामा तामाङला फेसन क्वान्सी स्यातोला । तामाङला रितिरिवाज झल्काप तादोला । फिल्मरीक्यार तामाङला सचेतना मुलक विषयकादे थान्दोला । चु फिल्म थुम ग्याम्से हृयाङ तामाङला काइरणदा जम्वुलिङरी ङोसेना लाबारी खाम्ला । हृयाङसे चु थुमदा म्हाना आहिन् ल्हेना फेना लाबारी बङ लातोला । जम्वुलिङला मोक्कोन तामाङला अस्तित्व योसी चु थुमरी वाङबा कलाकारजुगुसे चु थुमदा निरन्तरता पिन्सी ङहाँच्छा ब्रादोला । दारे खाबा चलचित्ररीक्यार तामाङलान कला फेसन ओन्तोला बिबान ज्यावा डान्बा ।

पिपलमाडी -१, झनझने, सिन्धुली
दन्ते सतुङगल, याम्बु ।