एला लामासे थान्बा मिन तिलोम ?
निमा डोल्मा तामाङ ।
ए छार्बजा खालाङ ?
ङा ११ वर्षदोना नाम्सारीन छार्बा हिन्ना । लिच्छा दिङ डु (६ वर्ष) याम्बुरी टिजी ओम दोसीइनोन दिङ ङ्हा (५ वर्ष) दोना नाम्सारीन निसी टिजी ।
थेराङ हिन्साम छाङ तेन डा पुइबारी सेला ?
(नेबान) सेला । ङादा छाङ-डा पुइबा तेन छे खान्बा अनुभव मुला ।
याम्बु ज्याबा कि नाम्सा ?
ङाई पाङनोन तोमा ङादा सेम निबा ग्लाजा ह्राङ केसी छार्बा ग्लानोन हिन्ना । दाते आपा आमा बेनान चुरीन मुबासे लामा याम्बुइनोन ज्याबान छोर्बा मुला ।
दिमरी खालखाल मुलोम ?
आपा, आमा, नाना-ङ्ही, आङा-गी, ओम आले-ङ्ही मुला ।
ओहो ! थेमेमी ल्हामा गा मुबा टिम ? एदा खाबाइबिमा ल्हामा मायाजा खाल्से लाबा मुला ?
मायाम बेनासेन लाबा मुला ।
फिल्मरीक्यार क्लाङसी ब्रामा आपा आमासे केबा मुला कि आकेबा मुला ?
हिन्ना, आपा तेन आमदा ङा कलाकारितारी वाङबा सेम अनिबा मुला । थेदासी केबाम स्वाभाविकनोन हिन्ना । तर ङाई ज्यानालासी आपा-आमदा सम्झप लाबा मुला ।
सम्झपजा खाराङ लासी लाला पाङगोम ?
ङाला बारेरी तिलाई छिन्ता आलास्युगो, ङा खाइमाइनोन न्होङसी आब्रा । चु थुमनोन ङाला सेम निबा थुम हिन्ना बिसी पाङला ।
थेराङ हिन्साम कलाकारितारी एदा दिम थेमेसे ह्रो आलाबा टिम आहिन ओम ?
आहिन ङदा परिवाररी नानसे ग्रेन ह्रो लस्युबा मुला थेदासी ङाला प्रस्तुतिरी ओम ङाई क्लाङबा फिल्म मायाला छो रीइनोन ङाला नाना डोल्मा लामा निर्मात्रीला भूमिकारी स्ह्युबा हिन्ना ।
नाननिला विवाह ताजी कि आताज्योम ?
तासी जिन्जी ।
एलाजा खाइमा लाबारी ओम ?
लक्ष्य तेन उदेश्य पूरा तासीजेगेन लाला ।
खाइमा तालोम उदेश्य पूरा ?
ङा गोर्की जामेकोला तासाइ ङा ह्राङला काङरी जहिले न्हेबारी खाम्ला जामाजेगेन विवाहला विषयरी सोचाप लाला ।
तिल्दा ? विवाह लासी निमा ह्यान्देम रेम्बोकोलासेन न्हाला माले ?
क्योङ तामाङ नाना आङाकादेसे चुराङबा सेमताम खाइमाइनोन अकिन्गाई विभा सुझाव मुला ।
छामेमी खुब स्होबा मुला रोलोम हिन्ना ?
छामे म्हि छामे आस्होसाम तिला ब्योन स्होसी ब्रातोबोम ?
एदाम बेनासेन छुच्ची घमण्डी विभा टिम लोम ?
तोबा तामरी ङा ठीकन मुला । ङाई खालाङ ह्रोकादेला ताम आथा । तर यदि खालाइसे ङाला विषयरी तोबा आतोबा ताम थाजीमाले बिसाम ङादा ग्रेन बोमो खाला ओम थेराङबा म्हीकादेतेन छ्याम भौतिक प्रतिकार लाबारीइनोन तयार ताबा ङाला अज्याबा स्वभाव मुला । ङा खासाई घमण्डी आरे । जससे ङादा घमण्डी बिसी पाङला थेनोन म्होकादे घमण्डी हिन्ना ।
दातेदोनामा खालाइला प्रेम प्रस्ताव खाजी कि आखाजी आलुना पाङ्गोम ?
ल्हामान खाजी तर ङाई थेदा नर्मल रुपसे च्याजी ।
तिल्दा प्रेम ह्राङबा स्हेअेन नर्मल ताला ?
ङाइ प्रेमदा नर्मल विभारी म्हाइबा आहिन । चु उमेररी प्रेम प्रस्ताव खाबाजा नर्मल हिन्ना बिभा हिन्ना । ङाई था मुला । प्रेम बिना चु जाम्बुलिङरी खालाइनोन सोबारी आखाम ताला ।
कला थुमला ताम लाअी । एदा चु थुमरी वाङबारी खाल्से प्रेरणा पिन्बा ओम ?
चु थुमरी वाङबारी प्रेरणा पिन्बा ङाला म्हेतोगी ह्रो मुला रजनी घिसिङ । थेलान साथ, समर्थन ओम प्रेरणासे लासी ङा चु थुमरी वाङबारी सफल ताबा हुन्ना । ङाई थे ह्रोदा खाइमाई म्लेबारी आखाम ।
फिल्मरी खाब्बाईविमा ङहाँच्छा रेम क्लाङमा खाराङबा अनुभव ताजी ओम ?
खासै ङादा क्लाङबा ह्राङबान आताजी । फिल्मरी क्लाङबा गे ग्रेननोन तासाई ङा नर्भस आताना आलोङना क्यामेराला ओन्छाङ अभिनय लाबारी खाम्जी वितोला ।
ब्योनकादेतेन छयाम ल्हामा ब्रापा मुला रो हिन्ना ?
ल्हामाजा बिभारी आदा । आलुना पाङतोमा ङाला ब्योन ह्रो छामेह्रो बिमाइनोन ल्हामा मुला ।
एदा धर्मकर्मला विश्वास मुला कि आरे ?
धर्मकर्म बिभा ह्याङला पूर्खला चिनारी हिन्ना । थेदासी चुदा म्हाना लाबारी आता विभा ङाला मान्यता मुला ।
एसे नेपालला खाब्बा खाब्बा ग्लाकादे कोर्ज्योम ?
ल्हामा कोर्वा आरे । कोर्तोवा दातोबा ग्लाकादे ल्हामान मुला ।
विदेशरीम ?
इन्डियाला दार्जिलिङ शहर दोनाजा निबा मुला । स्हयान फिरक्याप ह्युलरीक्यार निबा सेम मुला तर निबारी खाम्ला वा आखाम थे लिच्छन था ताला ।
राजनीति था मुला ?
ङादाजा तिलाइनोन था आरे । तर ङाला आपासेजा राजनीतिरी चासो लास्ह्युबा मुला ।
म्हि ल्हुई एदा खाराङबा छोर्बा मुला ?
ल्हुईला अर्थ गोसाम चु विभा खाब्बाइबिमा ग्रेन अमुल्य स्हे हिन्ना ओम आगोसामजा चु फोहोर ब्याङबा कन्टेनर ह्राङबा हिन्ना ।
ह्राङसे ह्राङदा कतिको जेबा म्हान्बा मुलोम ?
अँ, पाङनोन तोमा ङाला हाईट आरे ङा चुरी तिलाई असन्तुष्ट मुला ।
जामे कोलाजुगुला खाब्बाईबिमा ग्रेन कमजोरी तिला ?
ह्राङसे ह्राङदान कमजोरी ओन्बा ।
लिच्छारी सिनेम्हेन्दो ग्याम तिलाई पाङतोबा मुला ?
खाब्बाई बिमा ङा्हाच्छा ङाला चुदे सेमला तामकादे थआन्बारी पुङजी । थेदा लागिरी चु स्योस्योदा ल्हामान थुजेछे मुला । ओम ङाई चु कलाकारिता थुमदान निरन्तरता पिन्सी निसेला मुला । फिल्मला अभिनयकादेदा च्यासी ङाला कमिकमजोरी ओन्सी सल्लाह सुझाब ह्राङनीग्याम्से याङला विभा आशा लाबा मुला । ह्राङनिदा ङा सुकु मोक्तानला ज्याबाडान्बा ।
|
