तामाङ सेमल्हेङला थुमरी नारी स्रष्टाकादेला अभाब ताबा दुईरी म्हेतोगी नारी स्रष्टाला ग्लाग्याम गजलकार श्रृजना गोले गोर्गी प्रखर स्रष्टाला रुपरी थोन्बा मुला । दाते डोबान सञ्चार थुमरी ह्राङला गोङमा ल्हेबान काभ्रे जोङला भूम्लो सल्लेग्याम खाबा श्रृजनासे ह्राङला गिक्छा सेमल्हेङ छयोई (साहित्यिक कृति) दुइला ऐना तेसी गिक्छा गजलकार दोबारी सफल तासी जिन्बा मुला । तामाङ ग्योईदा माया लासी ह्राङला ह्युल तेन ह्युल्बादा डान्सी ह्राङला क्योलोलोला कलिलो दिङरी वाङबा श्रृजनाला सिर्जना च्यामा पक्कान भविश्यला परिजात हिन्ना विसी पाङबारी खाम्ला ।

यासे दिनि ख्याप्ला आमानो, एलान ङ्हाच्छा थोप ताला
लानो दोखाम्ला न्हाङगार ए विचार जे तिनि पोसामि (पृष्ठ ४२)

चु ह्युलकादे ताङसेला, आमाला छेएन छाङसेला
खुसीला गजल पाङसेला, आरेबादा योसामि (पृष्ठ-४२)

परिभासा अपुरो, जुनइ स्हेला जहिलेनो
सिर्जनादा ताप ताजि, विस्वासरि तिनि (पृष्ठ-३६)
("दुइला ऐना" ग्याम)

चु ताम थेला दात्ते बजाररी र्सबत्र ठाम्सी जिन्बा गजल 'दुइला ऐना' री म्राङबारी खाम्ला । ह्राङला ल्हुइदा वैयक्तिककरण विमाइनोन सामाजिकीकरण प्राथमिकता पिन्सी ङ्हाछा वाङबा श्रृजनाला सिर्जनारी तिलाइ विमा ल्हामा सामाजिक चिन्तन तेन परिवर्तनला सोच म्राङबा मुला ।

चु दुईरी श्रृजना गोले सेमल्हेङ थुमरी जेगेन सीमित आताना तामाङ सञ्चार समूहरी आबद्ध तासी तामाङ सञ्चार थुमरी समेत ङ्हाच्छा वाङसी जिन्बा मुला । च्याङना तामाङ सञ्चारकर्मी नानाआङाकादेरी म्हेतोगी सञ्चारकर्मीला रुपरी बेनासेन श्रृजना गोलेदा ङोसेसी जिन्बा मुला । पाङनोन तोमा छापा पत्रकारितारी चु दुइरी च्यामा श्रृजनाला योगदान ग्रेन म्राङबा मुला । लाला ङ्हीरेम थोन्सी खाबा पाक्षिक 'ताम्सालीङ' ओम 'छयोर्तेन' मासिक ह्राङबा स्योस्योकादे थेसे लाबा पत्रकारिताला उदाहरण हिन्ना । श्रृजनाला सिर्जना लेखन स्यान राष्ट्रिय स्योस्योकादेरीक्यारऐनोन म्राङबारी खाम्ला । चुराङले ल्होलो ल्होलो स्योस्योरीक्यार ह्राङला व्रिगु स्याङसी टिबा श्रृजना गोलेदा च्यामा म्हेतोगी क्रियाशिल, शिर्जनसिल पत्रकारला रुपरी किन्बारी खाम्ला । तिलाई दुई ङ्हाउ नेपाल एफ. एमला तामाङ ग्योइला गेताङ 'म्होइजेन' री समेत गेताङ प्रस्तोता दोसी रेडियोला समेत अनुभव किन्सि जिन्बा श्रृजनाला सिर्जना कृतिला लगाब, मिहिनेत ओम क्रियाशिलता तामाङ ह्युल्वालान लागिरी हिन्बा बिबा हयाङ क्योङसे म्हाँन्तोला । तामाङ एल्वमरी गोर्की ह्वाइ समेत ब्रिसि जिन्बा श्रृजना गोलेला सिर्जना ल्हामान सिर्जनशील म्राङबा मुला । सेमल्हेङ, पत्रकारिता ओम ल्होलो ल्होलो ह्राङबा विधारीक्यार सक्रिय श्रृजनाला क्षमतादा च्यामा चु म्हि तामाङ ह्युलन्हाङरी जे आताना क्योङ राष्ट्रलान राष्ट्रिय व्यक्तित्व दोबा सम्भावना म्राङबारी खाम्ला ।

प्रस्तुतिः- धनेन्द्र दोङ तामाङ

आपाङबान न्याय हिन्छाम, सेमरि जुलुस तिदा
साँचिन हयुल ब्रि, बिसम रोक होह्राङबान मुला (पृष्ठ-४)

म्राङ्जे ति म्राङ्मुबा, ङेसिन ख्लाजि मुसुक्क
मिजे ति छात्मुबा, तिङ्रिन टिजि सुटुक्क (पृष्ठ-२८)

सेम्रि ताम जोर्मा-जोर्मा, सद्दे क्हि म्योखाम्ला
विस्वासनो ग्रेन हिन्ना, सिर्जनादा पाङ्साम ताला खुसुक्क (पृष्ठ-२८)
("दुइला ऐना" ग्याम)