'एलामाया' ग्याम्से फटाफाट तामाङ ग्योइरी फिल्म स्होबारी चुबा निर्देशक सन्तलाल घिसिङ याक्खारगिला प्रयाशसे दातेदोनारी दोगामा गोरकु फिल्म स्होसी जिन्बा मुला । चितवनरी स्थाई धिम तासी याम्बु ङाम्ला हेराङ (ललितपुर) री पुख्र्यौली धिम मुबा सन्तलाल घिसिङ फिल्म थुम्ला खाबाइबिमा ल्हामा व्यस्त निर्देशक हिन्ना । कलाकारितारी वाङबा बिमा ङहाँच्छा सन्तलाल चितवनलान गोर्की लोपखाङला टिचर मुबा । टिचिङ लाबान ताङरी सामाजिक भावना थोबा थेसे तिलाइ रे दोना सिनर्जी एफ.एम. रीइनोन तामाङ ग्योइला गेताङ 'जेसुम' ला रेडियो प्रस्तोता दोसी मकवानपुर जोङला तामाङकादेदा छोर्ना लाबा गेताङ लाबा मुबा ।

चुरी पक्कान निर्देशक सन्तलालला फिल्मकादेला ताम लाई म्हान्जी । सन्तलाल घिसिङला गाङसाल दिङ निसिजिन्बा मुला । ह्राङ्ला म्रीङ ताना, जातुकु कोलाजुकु ताना ओम ह्राङनोन ताना सन्तलालला अवस्था तिन्हाङगार चुराङबान मुला । 'एलामाया' फिल्मग्याम्से दातेला 'दुःङाल' दोना दोगामा थेसे ल्हामान छामेकादेतेन 'जालमाया' लासी खाबा मुला । 'आगोबासे लासी' 'सुनमाया' दा लुछा सेम बो पिन्बा थेसे 'टाःना च्योदो'ला पिरती देब्जीम । चुराङबा ताबा बिसी दाबेन थेसे 'मायाला छो' च्योसी माया लाबा चुजिम । म्रीङ-कोलाजुकु मुबा म्हिदा खाब्बा छामेसे ज्यानालासी माया लाला र ? थेसे रिम्बा लुच्छा छो फ्रेक टाङसी सारी छयार ब्यासी 'आक्ताङराव' ताजीम । मुबा म्रीङ एन फिरक्याप हयूलरी पुइबासे थेदा रेन्बा खालाई आताजिम ओम सुङरी जामा थेसे शायद स्हु खासी मुलाताला ? 'च्याङबा'.... ! बिसी क्रिङजीम ओम गोर कु-कु फिल्म स्होसी छामे क्लाङबारी सेबा सन्तलालसे माया प्रेमरी 'दुःङाल' ला अर्थ गोसी दारेम ज्यानालासी टिबा प्रतिबद्धता थेसे लाबा म्राङला । छामेजा सन्तलालसे खाराङ लासी क्लाङबा मुला बिसाम ल्हामा ह्राङबा म्हिला खुइकादे ओम रेम्बोसे ख्लासी माइतीरी फुसु खासी टिबाकादे थेला छामे हिन्बा टिम । पोखरा, नारायणघाट, चितवनरीक्यार टिबा थे छामेकादेसे फिरक्याप ह्युलरी मुबा ह्राङला रेम्बोजुकुदा स्योङ म्लेबान जहिलेन् फोन लासी सन्तलालदा चुइ चुइ ङोबा लाबा टिम चुनोन म्हिकादेतेन छ्याम पिरती टिबासे मुनाम दार्से थेसे ह्राङला फिल्मरी क्लाङबा छामेकादेदा स्योङ म्लेसी जिन्बा मुला ।

तिल्दा 'दुःङाल फिल्म ज्याबा हिन्ना ओम ? बिसी ङयोइमा सन्तलाल घिसिङला प्रतिक्रिया चुराङबा मुला -ङाई स्होबा फिल्मकादेरी 'दुःङाल' खाब्बाइबिमा ल्हामान ज्याबा मुला । चु फिल्मदा ल्हामान दर्शकजुकुसे सेम लासी च्याला बिबा ङादा म्हान्बा मुला । चु फिल्मरी कथावस्तु, नाम्दार, हृवाई संगीत तेन निर्देशननोन बेग्लै मुला । चुरी ल्हामान राङबा पुरानो कलाकारजुकुला ग्रेन भूमिका मुला । अभिनय लावारी सेबा छार कलाकारकादेलाइनोन जोडदार अभिनय मुला । ङादा म्हान्बा मुला शायद चु फिल्मसे 'मायाला छो' ला विमाइनोन चौबर गुणा दर्शक ह्रुपला ताला बिबा ।

तामाङला अलावा क्योङ नेपाली हृयुलवालान दुःङालदा समेटप लासी स्होबा चु फिल्मसे बाध्यताबश गेला खोजीरी फिरक्याप हृयुलरी निसी दुःङाल नातोबा नेपालीजुकुदा दुःङालला ताम लासी र्सतकता ताना लाबा प्रयाश लाबा मुला । गोर्की बिधुवा नारीला नाम्दाररी स्होबा चु फिल्मरी अनिसा स्याङदन ह्राङबा अर्न्तराष्ट्रिय खेलाडीला एक्शनमुलक भुमिका मुबासे चु फिल्म बेनादा सेम ताला ङादा म्हान्बा मुला ।

सन्तलालला लक्ष्य ग्रेन मुला । चाहना थेला ब्लाबा मुला । गोरगी-ङहि फिल्म स्होसी कुटिसी टिबा स्हृयान्दो फिल्मला निर्देशक तेन निर्माताजुकुदा सन्तलालला चर्तिकला म्राङसी अचम्म ताबा मुला । वेनालान सुङताम मुला 'सन्तलालसे तिला लासी फिल्म स्होबा मुला बिदासी - नाम्दार हृवाईकादे खाइमा ब्रिबा - ओम तिला लासी थेसे निर्माता याङबा मुला ताला विदासी -''दुःङाल'ला डविङ जिन्सी मिक्सिङला ताङरी सिनेम्हेन्दोसे चुराङबा प्रश्न लाबा मुबा - दारेम फिल्म स्होबा आछयोजी ह्राङदा ? विसी ङयोइमा थेसे पाङला- ओ खालाङला यार ? १०१ वटा फिल्म स्होबा ङाला सेम मुला । दातेन खालाङला छयोलोम् ? नेवान थेसे पाङला ।

नायक राजु दोङला ल्हेङमो

'दुःङाल' री नायकला भूमिकारी क्लाङमा ह्राङदा खाराङबा सेम ताजी ओम ? विसी ङयोइमा राजुसे चुराङबा पाङजी- 'चु फिल्मरी निर्देशक सन्तलालसे ङादा ल्हामान ज्याबा रोल पिन्बासे चुरी ङादा सन्तुष्टन मुला । प्राविधिक तेन निर्देशन पक्ष ल्हामान ज्याबा मुला । चु फिल्मरी क्लाङबा धुइला तिलाई अविष्मरणीय क्षण मुला ? बिसी ङ्योइमा थेसे चुराङबा प्रतिक्रिया पिन्ना - सेलो हृवाइरी स्याबारी ङा कमजोर मुबासे चु फिल्मरी ङाई सेलो हृवाइरी स्यानोन तोबा अवस्था खाजी । सेलो हृवाइरी स्याबरी ह्राङला पालो खाइ लामा ङाला सेम लोङबा मुबा । तर ङाई सेलोरी ज्याबान लासी स्याजी । सेम लोङसी सेलो हृवाइरी अभिनय लाबा धुइनोन ङाला अविष्मरणीय क्षण हिन्ना ।

ङाई फाइदाला आशा लाबा आरे सन्तलालला फिल्मरी लगानी लाबाकादे ल्हामा ह्राङबा सामाजिक भावना ओम समाजसेवा लाबाकादे म्राङला । प्रतिभा मुबा म्हिदा तोर थिसी पिन्सी सहयोग लाबा तामाङजुकुइनोन हृयाङला तामाङ हृयुल्वारी म्राङला । चुनोन ताङरी सन्तलालसे स्होबा कुच्छा (नवौ) फिल्म दुःङालरी लगानी लासी सहयोग लाबा म्हेतोगी निर्माता हिन्ना-विनोद स्याङदन । काभ्रेला नमोबुद्ध धिम मुबा विनोद स्याङदनदाइ ह्रुप तासी तिलाइ ताम ङ्योइमा थेसे चुराङबा बिबा मुबा - "पाँच लाखला हराहरीरी लगानी निसी जिन्बा मुला । लगानी रेला या आरे ङादा तिलाइनोन था आरे । तिलाई बिभा ग्रेन च फिल्म चलपतातोजी ओम दर्शकजुकुसे ल्हामा माया लादोजी । व्यक्तिगत फाइदाला लागिरी ङाई लगानी लाबा आहिन । बेनाला माया याङसाम जाकार टाङगा रेसाम चुग्याम रेबा टङ्गा दाबेन खाबा फिल्मरीन लगानी लाबा ङाला सेम मुला । चु फिल्म ज्याबा ताला बिवाजा ङादाइनोन ग्रेन आशा मुला ।"

-विनोद स्याङदन (प्रमुख निर्माता दुःङाल)

नायिका रोशनी लामाला ल्हेङमो
'दुःङाल' री अभिनय लामा खाराङबा ङहाम्जी ओम बिसी ङयोइमा रोशनीसे चुराङबा बिला - "अँ ल्हामान ज्याबा ताजी । रमाइलो ताजी । चुरी हृवाई संगीत तेन प्राविधिक पक्ष बेनान ज्याबा छोर्जी । शुटिङला धुइरी ह्राङसेन ड्रेशप लातोमाजा तिलाई दुःङाल ङ्हाँम्जी । स्हयानमी बेनान ठीकन मुला । चुरी क्लाङबा धुइरी म्लेबारी आखाम्बा अविष्मरणीय क्षण विबाजा ल्हामान सेन्टिमेन्टल तासी क्रातोबा धुइला मुबा । स्युङमेसे कोला बयानसी बोर्बा धुइरी ल्हामान क्रासी लातोबा अभिनय ङादा ल्हामान गाह्रो ङ्हाम्जी । थेनोन भूमिकारी लाबा अभिनय अविष्मरणीय बिसी पाङतोला । धुलिखेल, पकुचा काभ्रेला रोशनी लामाला कलाकारितारी गिक्छा रेम वाङबा फिल्म 'छोर्बा' हिन्ना । जाजामा हृयान्देन स्याबारी सिपालु रोशनीला अभिनय तेन थेला आकर्ष जीउडालला कारणसे लासी दुःङालरी थेसे ग्रेन मौका याङबा हिन्ना बिसी पाङबारी खाम्ला । दाते प्लस टु डोसी टिबा रोशनीला हाइट अन्दाजी ओराङबान ५ फिट ३ इन्च नोबा मुला । तामाङरी दातेदोनारी छार कलाकाररी खाब्बाई बिमा जेबा अभिनय लासेबा ओम ट्यालेन्ट केटी रोशनी लामान हिन्ना बिसी सन्तलालसे पाङबा मुला । लिच्छाला ताङरी दोसीइनोन चुराङबा पाङला - "दारेम रोशनी हिट ताला । रोशनीदा नाङबा स्यान्दो केटी खाबारी गाह्रो ताला बिबा ङादा म्हान्बा मुला ।"