सानै उमेरदेखि कलाकारितामा अभिरुची राख्ने नायिका रोशनी लामा वाइबा आफू झुक्किएर तामाङ फिल्म क्षेत्रमा प्रवेश गरेको बताउँछिन् । काभ्रेपलाञ्चोकको रमणिय शहर धुलिखेल नगरपलिका वडा नं. १ पकुचामा वि.सं. २०४५ सालमा आपा सानु लामा वाइबा र आमा संगिता स्याङदानको कोखबाट जन्मेकी परिवारको एक मात्र छोरी रोशनी लामा तामाङ फिल्म क्षेत्रमा प्रवेश गर्दाको रमाइलो क्षण यसरी सुनाउछिन् - "खासै मैले यसरी तामाङ फिल्ममा खेल्न पाउँछु भन्ने सोचेकी थिईन । म स्कूलमा भर्खर आठ कक्षामा पढ्दै थिएँ । गाउँकै दाजु राजु लामा तामाङ फिल्म 'छोर्बा' को निर्माता हुनुहुन्थ्यो । म नृत्यमा केहि अनुभवि समेत भएकोले दाजु राजु लामाले मलाई उक्त फिल्ममा खेलाउनुभयो । शुटिङ टाढा भएको भए म शायद जान्नँ थिएँ होला । उक्त फिल्मको शुटिङ मेरो गाउँमै भएकोले आमा-बुबासँग सोधेर म फिल्ममा खेलेकी हुँ । बजारमा फिल्म चल्यो । मलाई धेरै दर्शकहरुको राम्रो प्रशंशा पनि आयो । त्यही फिल्मको प्रभावले गर्दा तामाङ चलचित्र निर्देशक दाजु सन्तलाल घिसिङ म कहाँ आउनु भएर अर्को तामाङ चलचित्र 'दुःङाल' मा खेल्न अनुरोध गर्नुभयो । म कक्षा १२ को अध्ययन क्रममै रहेकीले पढाई बिग्रिन्छ कि भनेर आमा-बुबा सजग हुनुहुन्थ्यो । तैपनि सबैसँगको सरसल्लाह लिएर फुर्सद मिलाएर मैले 'दुःङाल' मा खेलेकी हुँ ।