रमिता लामा बल तामाङ ह्युल्बान्हाङला म्हेतोगी चर्चित सञ्चारकर्मीला मिन हिन्ना । सरकारी सञ्चार माध्यम रेडियो नेपालरी क्योङ तामाङ ह्युल्बाला प्रतिनिधित्व लासी खाबाइबिमा ङहाच्छा रेम तामाङ जामेकोलाला तर्फयाम्से रेडियो पत्रकारिता थुमरी वाङस्ह्युबा रमिताला पुख्र्यौली ग्ला दातेला रामेछाप जोङला डडुवा गा.वि.स. वडा नं. डु पात्लेरी हिन्ना । चुनोन ग्लारी वि. .सं.. २०२६ सालरी६ आपा पेमा लामा बल तेन आमा मार्तेन घिसिङला कुग्याम्से केवा किन्स्ह्युबा रमिताला कलिलो उमेररीन ह्राङदा केवा पिन्बा आपासे जाम्बुलिङग्याम्से थारेङ ताबासे आपाला स्ह्याल म्राङआम्याङबा दुःङाल नातोबा रमिताला ल्हुइला बेनान स्याहार तेन छार्ना लाबा अभिभारा गोर्की आमाला थोरी खाजी । गोर ङ्ही ज्योज्यो आले, गोर ङ्ही नाना आङाकादेरी खाबाइबिमा च्याङबा जामे ताबासे रमितादा दिमथेमेग्याम्से ज्याबा माया याङजी । आपा र्स्वर्गवास तासाइनोन रमितादा आमसे नाम्सारिन ज्यानालासी शिक्षादीक्षा पिन्सीनाम तिलाई अभावकादे ताना आलाबा मुबा । वि.सं. २०४५ सालरी एस. एल. .सी.. लास्ह्युबा रमिता लामा बलसे दाते दोगातासी बिएड दोना डोस्ह्युवा मुला । रेडियो नेपालरी पत्रकारिता लासी तामाङ ह्युल्बादा डान्सी समाजसेवा लासी ज्योन्गाबा रमितासे ल्हुइला गाङसाल दिङ निसि जिन्र्साई ह्राङला ल्हुइला विवाहला विषयरी तिरेम सुत्ताई सोचाप ताबा फुर्सद आताजीम । तिरेकुनु सिनेम्हेन्दो स्योस्योसे रमिता लामा बलला वास्तविक ताम म्हाइबा सेम थोसी प्रत्यक्ष ह्रुप तासी चु ह्राङबा ब्रोइ खाबा ताम लाबा मुबाः-
नाना तिल्दा विवाह आलास्ह्युबोम ?
खाइ, ङादा विवाह लाबा सेमनोन आताजी ।
तिल्दा ?
(नेबान) ओराङनोन ।
विवाह आलानान स्ह्युबारी ओम ?
ङाई विवाहला विषयरीम सोचापनोन ताबा आरे । अटोमेटिकली तासामजा आर्कुन ताम हिन्ना ।
अटोमेटिकली बिभाजा खाराङबा ?
सोचापनोन आताना ओराङनोन ताबा विवाह माले ।
तिल्दोम नाना ह्राङदा विवाहला प्रस्ताव आखाबा कि तिला ?
आहिन विवाहला प्रस्तावमी ल्हामान खाबा मुबा तर ङाइनोन अस्वीकार लाबा हिन्ना ।
तिल्दा अस्वीकाराप लास्ह्युबोम ?
विवाह सोचाप तासाम ग्रेन तामऐ हिन्ना, ग्रेन तामऐ आहिन । ङाला विचाररी जामेकोला या जो खालाइसे विवाह लानोन तोला बिभाला आरे । ङादा क्योङ तामाङ ह्युल्बान्हाङरी घुलमिल ताबा अवसर याङबा मुला । बेनान तामाङ ज्योज्यो आले तेन् नानाआङाकादेला गुङरी माया ममता किन्बा पिन्बा लाम्याङबा मुला । चुरीन ङादा ग्रेन सन्तुष्ट मुला । स्हयान्से तिल्दामान बिसाइनोन विवाह लानोन तोला विभा पक्षरी ङा आरे ।
ठीक मुला नाना ह्राङला रेडियो नेपालरी वाङस्ह्युबा दुइला तिलाइ अनुभव जाकी पाङस्ह्युगोले ?
खास पाङतोमा रेडियो नेपालरी खाबाइबिमा ङ्हाच्छा रेम साङग्युर पाङबारी निमा खासै सेम आलोङर्साई तामाङ ग्योइला छिगकादे खाब्बा ग्लाला खाराङ लासी उच्चारण (Pronounciation)लामा ज्याबा ताला बिभा तामरी ङादा कठिनाइ ताजी । तर तासाइनोन ङाई बेनासेन गोबा पारासे तामाङ ग्योइला छिगकादे दाम्सी खाबाइबिमा ङहाच्छा रेम रेडियो नेपालन्हाङरी निसी साङग्युर बाचन लाजी । जामा दुइरी ङादा बेनालान ज्याबा प्रशंशाकादे खामा झन दंङ्ग तासीनाम ङाई ज्यानालासी चुत्दान निरन्तरता पिन्सी निबा हिन्ना ।
ओम् ह्राङ खाराङ लासी रेडियो नेपालरी वाङस्हयुबोम ?
ताम २०४८ सालला हिन्ना । क्याम्पस डोबान शिक्षा मन्त्रालयरी जागिर चाबा ताङरी दाते याम्बुरी मुबा समाज कल्याण परिषदसे रेडियो नेपालरी नेपाली समाज सेवा गेताङरी टेण्डर ह्रिबा बिभा ताम ङाई था याङजी । नाम्साला गोर्की ज्योत्से ङादा थेरी बोर्सी टेण्डर युबारी पुङजी । २०५० सालरी खाबाई बिमा ङ्हाच्छा रेम रेडियो नेपालरी वाङसी समाजसेवा गेताङ स्हेङ्बा अवसर याङबा हिन्ना । चुनोन ताङरी तामाङ ग्योईला साङग्युर बाचनरी नोन २०५१ सालरी ङा सेलेक्ट ताबा हिन्ना ।
नाना ह्राङ रेडियो नेपालरी वाङबा बिमा ङहाच्छा तिला लास्ह्युबा मुबा ?
ङा लोपखाङला टिचर मुबा । कास्की जोङला पोखरारी ङाइ दिङगी टिचर तालिमअे किन्बा हिन्ना । चु ताम २०४५ सालला हिन्ना । लिच्छा खसी २०४८ सालरी रत्न राज्य क्याम्पसरी उच्च शिक्षा डोबालान ताङरी शिक्षा मन्त्रालयरीइनोन तिलाइ रे दोना गे लाबा अवसर याङजी ।
(चु रेडियो नेपाल हिन्ना । रमिता लामाग्याम साङग्युर ङ्यान्स्ह्युगो ।) चु गेताङ लाइभ कि रेकर्डिस्ट ओम ?
''लाइभ' नोन हिन्ना ।
ह्राङसे साङ्ग्युर पाङबा बिमा ङ्हाच्छा स्रोतजा खाराङ लासी ह्रुप् स्ह्युला ओम ?
थेमी रेडियो नेपाललान साङग्युर स्रोत ग्यामसेन याङला । थेदा तामाङ ग्योइरी अनुवाद (Translat) लासी पाङबा जे गेन हिन्ना ।
ऐ, थेराङ हिन्साम ह्राङलान तोसासे साङग्युर थान्सी प्रसारण लाबारी आम्याङबा टिम आहिन ओम ?
खालाङला थेराङ लापुङलोम नाओम ? ह्राङलान तोसासे थेराङ लासी प्रसारण लापुङसाम ज्याबा तासेदा माले ।
ह्राङसे फिल्डरी दुइबा रिर्पोट जुकुमी ?
कादे महत्वला टिम च्यासी प्रसारण लापुङला ।
ह्याङ तामाङला रिर्पोटजुकुमी प्रसारण लापुङला आहिन ओम ?
चु ऐन विशेष हिन्साम जेगेन लाबारी पुङला ।
ह्याङला ग्योइ थेनिसे आगोगोम खाइमाम थेन्ना साङग्युर थासी ह्याङलान तामाङला तिलाइ तामसुरजुकु थान्तोबा माले ?
(नेबान) ओहो ! चु मि सम्भवनोन आरे माले । रेडियो नेपालन्हाङला नीति नियमरी टिदोला ।
आहिन्साम जागिरनोन ब्राला आहिन ओम नाना ?
हिन्ना योम, म्हिला ग्लारी..... ।
ह्राङमि सरकारी सञ्चाररी गे लास्ह्युबा म्हि सञ्चारमन्त्रीन् माओवादी नेता दोसीजिन्बासे दारेम खाराङबा परिवर्तन ताला म्हान्बा मुला ?
परिवर्तनमी अवश्यन ताला माले । समाचार तेन स्ह्यान गेताङजुकुला गेताङ स्हेङबा ढाँचा परिवर्तन ताला म्हान्बा मुला ।
दातेजा तिला परिवर्तन ताजी ओम ?
ङ्हाच्छाला बिमाम् परिवर्तननोन ताबा मुला । तासाईनोन सन्तोषजनक परिवर्तनजा ताला स्याब्बा आरे ।
सन्तोषजनक परिवर्तन बिभाजा खाराङबा ?
ह्याङ ह्राङबा जनजातिकादेदा खाब्बादामान विषयरी गेताङ स्हेङबारी निजिस्तरला रेडियो एफ.एम. कादेसे ह्राङनोन खुलस्त ग्ला पिन्तोला । चुरी जनजातिकादेदा च्योच्यो ग्ला पिन्तोला ।
राजनीतिक चासोजा कादे मुलोम ?
अँ, चासोजा मुला । तिल्दाबिसाम ङाला दिमथेमेन राजनैतिक वातावरणला मुला । ङाला गोर्की ज्योज्योसेइ नोन नाम्सारी स्ह्युसी ङ्हाच्छा राजनिति लास्ह्युबा मुबा ।
२०४८ सालरी तामाङ हवाइ मिनला एल्बमरी ह्राङला चर्चित ह्वाई (या ताला च्याङबा या ताला या ताला च्याङबा...) बोलला ह्वाई एल्बमरी ह्राङसे कादे वटा ह्वाई कोस्हयुबा मुबा ?
गोर ब्ली मुबा ।
संगीतदाइनोन खुब माया लास्हयुबा टिम । तिल्दा दोसीइ हवाई आकोस्ह्युबोम ?
ह्वाईनोन कोइ बिसी ङा आब्राबासे लासी हिन्ना । ङादा ह्वाइ कोबा सेम दात्तेदोनान मुला ।
सञ्चाररी ह्राङसे स्यान तिलतिल गेताङ लास्हयुजी पाङस्ह्युगोम नाना ?
स्हयान पाङतोमा २०५२ साल ह्यान्दे २०५८ साल दोना रेडियो नेपालरीन सांसद फोन इन गेताङ स्हेङजी । थेराङनोन २०५९ सालरी इमेज टेलिभिजनरीइनोन नेपाली ग्योइरी समाचार बाचन लाबा अवसर याङजी ।
ह्राङसे विदेशला यात्राइनोन लास्ह्युजी ?
खासै ओदेनिना यात्राम लाबा आरे । २०६१ सालरी 'लण्डन' दोनाजा निबा मुबा । स्ह्यान भारतला दार्जिलिङ दोनाजा यात्रा लाबा मुला ।
नानना ल्हुइरी तिलाइ म्लेबारी आखाम्बा क्षणजुकु मुला ?
अँ........... (जिबान) गोर्की मुबा तर म्लेजि ।
नाना ह्राङसे मिनला लिच्छा तामाङ आब्रिना तिल्दा लामा ब्रिस्ह्युबोम ?
बेनान लामा ब्रिभाजुकुदा दात्ते तामाङनोन बिसी ङोसेबा मुला थेदासी ।
नाना, बातमी ज्याबा लाजी । दारेम फेबारी आहिन ओम ?
(नेबान) ताला ।
लिच्छारी पाङतोबा तामजुकु तिलाइ मुलोम ?
खासै आरे । सिनेम्हेन्दो स्योस्योला प्रगति ज्याबा तागाई । चुरी बेनान तामाङ ग्योई, धर्म तेन रीमठीमकादेसे ग्रेन ग्ला याङगाई । ओम तामाङ ह्युल्बान्हाङरी टिसी समाजसेवा लाबा खालादामानला चु स्योस्यो सेमला ढुकढुकी दोबारी सफल तागाई । सिनेम्हेन्दो पक्कान म्हेन्दो ह्राङबान तासी सार्सी टिगाई । ङाला ज्याबाडान्बा मुला ।
प्रस्तुतिः- विष्णु दोङ तामाङ
|
