मोलाम ग्याम्से हाङला प्रतिभा ओन्सी खाबा नायिका रजनी घिसिङला केवा वि.स. २०४२ साल पुस लाला १६ गते आपा राम कुमार घिसिङ तेन आमा यङरी डोल्मा योञ्जनला कुग्याम दातेला काभ्रेपलाञ्चोक जोङ माझीफेदा गा.वि.स वडा नं. ब्लीला बिला नाम्सारी ताबा हिन्ना । ५ फिट ३ इन्च हाइट ला प्रविणता प्रमाण-पत्र तह दोना डोबा रजनीसे दाते दोनामा मोलाम, टानाच्योदो, आक्ताङराव तेन सुनमाया ह्राङबा तामाङ ग्योइला फिल्मकादेरीक्यार क्लाङसी जिन्बामुला । चु बिमा ङ्हाच्छँ बेनान फिल्मरीक्यार सेन्तेर (टङ्गा आकिन्ना क्लाङबा) फिल्म स्होबाकादेदा योगदान पिन्बा थेनोन नायिका रजनी घिसिङदा चु सिनेम्हेन्दो स्योस्योसे प्रत्यक्ष ह्रुप तासी लाबा ल्हेङमोः-

तिला मुलोम घिसिङला हालखबर ?
ठीकन मुला, अफिसरी खासि ड्युटी लाबा मुला ।

फिल्मरी आक्लाङनाम तिल्दा अफिस ड्युटी लाबोम ?
तिला लासे फिल्मरी क्लाङसी ङा बेरोजगार तादोबा मुलोम ?

आच्या ! तिल्दा ऐन्दा टङ्गा आखा ?
खाई दातेदोना खाल्सेइनोन पिन्बा आरे । उल्टो सुटिङरीक्यार निमा ह्राङलाजा खर्च निबा मुला ।

ह्रितोबा माले, आह्रिबा मुनाम ओम ?
ह्रिबा आहिन, दारेमजा फिल्म क्लाङबारी अफर खासाम श्रमला फल कादे खाला विदासी ङ्हाच्छा ङ्योई तोला ।

चुराङबा विडम्बना बेनालान हिन्ना ?
ङाई स्ह्यानना तिलाई था आताजी । बरु ङाई थेबाजा पारिश्रमिक पिन्बाम खालाङ खालाङ उल्टो निर्माता तेन निर्देशकजुकुसे कलाकारकादेदा टङ्गा किन्बा लाबा मुला रो ।

चुह्राङबा समस्या समाधान तिलासी तालोम ?
ल्हामा च्याङना पारिश्रमिक कलाकारकादेदाइनोन पिन्बा व्यवस्था लादोला । सेनतेर लावा अभिनय तेन कलाकारला महत्वइनोन आताबा टिम । गोर्की कलाकारला अभिनय च्यासी थे अनुसारला पारिश्रमिकला व्यवस्था लासाम फिल्म स्होबा निर्माता, निर्देशक तेन कलाकारकादेसे चु थुमरी निरन्तरता पिन्बारी खाम्ला । निर्माता, निर्देशक तेन कलाकारकादेला गुङरीनोन ज्याबा सम्बन्ध ताला ओम खावा रेकादेरीक्यार स्होबा तामाङ फिल्मकादेसे सफल याङला । चुनोन समस्याला समाधान हिन्ना ।

ठीकन मुला, ऐला नाम्सारीमार ङोसेबा मिननोन रजनी हिन्ना ?
हिन्ना । नाम्सारीमार ङादा चमेली विसी ङोसेवा मुला ।

लामासे थान्बा मिनमी ?
धनमाया ।

निराश म्राङ मुलोम ? खालाइसे धोका पिन्जी कि तिला ?
आहिन । ङा चुराङबान हिन्ना । वास्तविकतारी ङा निराश म्राङबा मुला । चुराङबान निराश (सेन्टिमेन्टल) भूमिकारीन ङाई ल्हामा ह्राङ्बा अभिनय लाबा मुला ।

विवाह खाइमा लाबारी ओम ?
विचार लातोला ।

खाइमा विचार लाबारी ओम ?
जहिले प्रस्ताव खाला जामान ।

प्रस्ताव आखाजी ?
खाबा मुबा तर ङादा सेम आनिजी । सेम निवा म्हितेन छयामजे विवाह लावा ङाला सोचाई मुला ।

थेराङ हिन्साम दाते खालाइतेन लभसभ मुला कि आरे ?
खासै आरे बितोला ।

डेटीङमी लाबा मुला ताला लोम ?
थेमी जाकार खाल्दामानतेन ताला माले ।

कम्प्युटर साइबररीक्यार वाङसी खुब च्याटिङ ऐन लाबा रो मुला बिभा थेमुलोम ?
खाल्से पाङबा ? चु ताम अहिन ।

तामाङ नानाआङाजुकुला दात्तेला अवस्था खाराङबा म्राङबा मुला ?
ङहाँच्छाला ह्राङबा आरे । दाते बेनान गोसीजिन्बा मुला ।

पारिश्रमिक बिनाला दारेम फिल्मरिन आक्लाङबारी आहिन ओम ?
हिन्बाम ङाई चुराङबा ताम ब्यवसायिक फिल्म स्होबा निर्माता तेन निर्देशकजुकुदा पाङबा हिन्ना । कलाकारला अभिनयला साईऐन खागाई बिभा ङाला सेमताम हिन्ना । ज्याबा फिल्मरी ङादा डिक्पा रोलरी फुर्सादला दुइरी खासामजा टाङगा बिनाइनोन ङा क्लाङला । टाङगान तोला बिसी ङा घमण्डी दोगे लाबा आहिन । चु मि ङाई फिल्मरी क्लाङबा कलाकारजुकुदा निर्माता तेन निर्देशककादेसे च्यागाइ बिसी पाङबा हिन्ना ।

रजनीतेन दारेम फेसी नि आता ? सिनेम्हेन्दोग्याम तिलाई लिच्छारी पाङतोवा ताम मुला ?
ङाला चाहना कलाकारिता लाबा हिन्ना । चु कलाकारिता बिभा समाजसेवान हिन्बासे लामा चु थुमला बेनान म्हिकादे ज्यानालासी डिक्तोला । खाबा रेकादेरीक्यार तामाङ फिल्मरी क्लाङवा बेनान कलाकारजुकुला मूल्याङ्कन तागाई । कलाकारला श्रम शोषण खालाईसे आलागाई । कलाकारसे लाबा श्रमला उचित र्साई याङगाई । चुराङबा तामा जेगेन तामाङ फिल्मकादेसे तामाङ हृयुल्वारी ज्यावा प्रभाव लाबारी खाम्ला लिच्छारी चु सिनेम्हेन्दो स्योस्यो लाखौं तामाङकादेला गुङरी गोर्की तीङला ढुकढुकी दोगाई । वास्तवरी सिने म्हेन्दो साँच्चिन म्हेन्दोन दोसी सार्सी टिगाई ङाला मोलाम मुला ।