फ्लिक च्यामा प्रकाश ब्लोन चुदे सोझो म्राङला सायद ! थेसे फ्लिक च्यामा ग्यामरी ब्रामा खालाईनोन छामेजुकुसे ङोसी ग्याम पाङमा "कोरोले ङादा ग्याम बउ" दोनासुतान बिभारी आखाम ताला ह्राङ्बा ङ्हाँम्ला । चुल्लाम तामनोन ख्लागो, मोबाइलरी खालाई छामेजुकुला फोन खामा सुताइ माया पिरतिला ताम लाबा ख्लादासी ओन्छयान सोझो प्रकाश ब्लोन थे छामेकादेदा ह्राङला मोबाइलरी "तिला मुला हालखबर ?" तिलाइ विशेष गेजुकु मुलाउ किजा बिसी ताम ङयोइ टिला । उमेररी ब्योनजुकुदा छामेकादेला चासो छामेजुकुदा ब्योनकादेला चासो अवश्येन ताबा ताला बिभा ताम बेनादान था मुला । चुरी प्रकाश ब्लोनदा छामेकादेला चासोन आरे बिदासीजा खालाइसे पाङबारी आखाम । क्योलोलोला हाल खाबा जोवनरी सुताई छामेकादेतेन ब्योन स्होबारी आसेबा प्रकाश ब्लोन ह्राङबा म्हेत्तोगि सोझो ब्योनसे खाराङलासी न्हाङन्हाङ ल्हुइला ह्रो दाम्जीतालोम बिभा रोचक सेम छुबा वास्तविक ताम म्हाईबा प्रयास चुरी लाबा मुला । खाब्बाइ बिमा ङ्हाँच्छा चु प्रकाश ब्लोन विभा खाला ? खालाङला ? तिला गे लाबा म्हि मुला ताला ? बिसी खालाइ छारह्रोकादेदा सेमरी तुलपुल ताबा स्वभाविक हिन्ना । थेताबासे प्रकाश ब्लोनदा ङोसेना लातोबा आवश्यकता म्राङबा मुला ।

याम्बु ङामला काभ्रे जोङरी गोर्की गजबला तामाङ नाम्सा मुला । ल्हामा ह्राङबा ब्लोनकादे मुबा थे नाम्साला मिन हिन्ना 'कालिञ्जोर नाम्सा' । पलाञ्चोक गाङग्याम्से मार च्यामा खाब्बाइबिमा ङहाच्छा सुनकोशी गान्ती म्राङला । माथाङ माथाङ निसाम चुनोन प्रकाश ब्लोनला धिम मुबा नाम्सा कालिञ्जोररी स्हाङ दोबारी खाम्ला । चुनोन नाम्साला दृश्यकादेदा क्यामेरारी कैद लासी ह्राङसे स्होबा फिल्म 'मोलम' ला ल्हामान सीनरीक्यार हाइलाइट लासी थान्बासे लामा 'मोलम' च्यास्युबा दर्शकजुकुसे प्रकाशला नाम्साइ म्राङसी जिन्बा मुला । क्योलोलो बोगाल गिसेइ ब्ली दिङरीजे वाङबा प्रकाश ब्लोन ला चाटुपऐ (शारिरिक बनौट) जाजान मुला । पाङनोन तोमा ओराङबान ५ फिट २ इन्च ते नोबा थेसे दाते ब्याचलर लाबाइकेन मुला ।

तामाङ कलाकारिता तेन पत्रकारिता थुमरी चु प्रकाश ब्लोन छार मिन आहिन । तामाङ ग्योइला सफल फिल्म 'मोलम' ग्याम्से बेनासेन ङोसेसी खाबा प्रकाश ब्लोनला कलाकारिताला विषयरी चर्चा लातोमा थेसे खाब्बाइ बिमा ङ्हाच्छा 'म्हेन्दोला माया' बिभा फिल्मरी पटकथा तेन सहर्-र्निदेशन लास्हयुबा मुबा । पत्रकारिताला ताम लातोमा तामाङ ग्योइला चु बिमा ङ्हाच्छा थोन्बा 'तिमाल टाइम्स', 'छार गोङमा' तेन 'ताम्सालिङ' ह्राङबा तामाङ स्योस्योकादेरी ह्राङला लेख-रचनाकादे ब्रिसि खाबा प्रकाश ब्लोनसे चु बिमा ङहाँउ प्रकाशन ताबा जनजाति स्योस्यो राष्ट्रिय मासिक 'मंगोल' रीनोन सह-सम्पादक दोसी गेलास्हयुबा मुबा ।

खालारीई तामाङ स्टेज प्रोग्रामजुकु तामा प्रायः कादे ज्याना ज्यूम नेसी प्रभावकारी उदघोषण लाबारी सिपालु प्रकाश ब्लोन म्हेतोगी सफल उदघोषक ऐनोन हिन्ना बिसी पाङबारी खाम्ला । तिल्दाबिसाम नेपाल तामाङ कलाकार संघसे लाबा प्रायः खब्बातामान सांगीतिक गेताङजुकुरीक्यार प्रकाश ब्लोनला ह्राङलान मौलिक उद्‌घोषण प्रस्तुतिकरणरी प्रभावित आताबा तामाङ दर्शकजुकु सायदै खालाइनोन आरे ताला ।

कलाकार तेन पत्रकार प्रकाश ब्लोनदा ङोसेतोमा चुदेजे बिसी आछयो । कलाकारितालान विषयरी पाङतोमा प्रकाश ब्लोन फिल्मला नाम्दर ब्रिबा, निर्देशन लाबा बिभा ताममि ह्राङला ग्लारि मुला । स्योस्योरीक्यार ब्रिबा बिभाम थेला गोर्की टाइम पास जेगेन हिन्ना । तर थेला खाब्बाइबिमा ग्रेन लगाब बिभा ह्वाई ब्रिबा हिन्ना । ल्हामान तामाङ ह्वाइकादे ब्रिसी जिन्बा थेदा दाते गोर्की सफल गीतकारला रुपरीइनोन बेनासे ङोसेसी जिन्बा मुला ।

हवाई ब्रिबा फिल्मला निर्देशन लाबा तामाङ सञ्चारला थुमरी टिसी पत्रकारिता लाबा चुनोन सोझो बहुप्रतिभाला फ्युक्पो प्रकाश ब्लोनला नाम्साधिमरीक्यारला ओम नागरिकताला मिनजा 'जोगलाल' हिन्ना । जोगलाल, हरिलाल ओम तिल्दामान लाल मुसाई थेला चर्चित मिनजा प्रकाश ब्लोन नोन हिन्ना । प्रकाश ब्लोन बिमा बेनासेन ज्वाट्ट चुनोन प्रतिभावान ब्योन म्हिदा झिला । कलाकारिता तेन पत्रकारितादान पेशा स्होसी जिन्बा प्रकाश ब्लोनदा तिन्हाङगार थेदा तामाङ ह्वाई ब्रिबारी फुर्सदनोन आरे । तामाङ ह्वाईला माग ल्हामा तासी निबासे ज्याबा ह्वाईला छिगकादे ब्रिबासे लासी प्रकाश ब्लोनदान बेनासे ह्वाई ब्रिबारी अफर खाबा हिन्ना । चुमि ताजी प्रकाशला प्रतिभाला तामदा लागिरी खाबा अफरकादे । चुरी प्रकाश ब्लोनला सेम छुबा गोर्की अफरऐन मुला । थे अफर बिबा धिमग्याम आपाआमासे जहिलेन विवाह लाउ बिभाला अफर हिन्ना । धिमला जाग्रेन ताबासे चु ताबा स्वभाविक हिन्ना । छामे ङोबारी सेसाइ आसेसाई सोझो प्रकाश ब्लोन न्हाङन्हाङजा बिसाम सेम डिक्पा ल्हुइला ह्रो दाम्बारी सिपालु मुबा टिम बिभा तामला संकेत स्याब्बा मुला । चु संकेत बिभा लाला तिरेम या ङ्हीरेम तेमालग्याम्से म्हेतोगी थेतेनछयाम सेम डिक्पा छामेला मोबाइल खाबा कारणसे लासी हिन्ना । थेनोन छामे ह्राङला ल्हुइरी बुक तासी जिन्बासे लामा ओर्सेसे छामेला मिस कल खाबाला पाऐन थेसे तुरुन्तन खाबा फोन नम्बरदा रिटर्न ब्याक लासीनाम नेबान चुराङबा बिला- "ओई, तिल्दा फोन लाबा ? पढाइ खाराङबा मुला एला ? पढप ज्याना लाउ ह्या ? स्हयान छामेकादेला फोन खामा खाइमा फोन थान्ना ह्राङ लाबा प्रकाशसे चु तेमालला सेमला ह्रोतेन छ्र्यामजा बिसाम मोबाइलरी टङ्गा थुम आबेदे दोना ताम लाला ।

सोझो प्रकाश ब्लोनला ङ्होरीइनोन सोझोन छामे ब्रिबा । प्रकाशसे तिला बिभा थेनोन ङ्यान्बा थे छामे तेमालरीन टिसी दाते प्लस टु डोसी टिबा मुला । चुनोन छामेतेन छ्याम प्रकाश ब्लोनला पक्कान जालमाया टिसी जिन्बा मुला बिभा ताम थेला चालामाला तेन संकेतसे प्रष्ट ओन्सी जिन्बा मुला । खालाइ म्हिदा ल्हामान दिङ दोना जालमाया लासाइ माया पिरति सफल ताना लाबारी गिसेम गीला सेम आडिक्ना खाराङ ताला ? तर, चुरी तिरे तेमाल कोर्बारी निमा तिरेला ह्रुप तेन परिचयरीन खाराङ लासी गिसेम गिरी सेम निग्याम बिभाजा चुनोन कलाकार ओम पत्रकार प्रकाश ब्लोनदान ह्रुप तासी ङयोइमा जा ज्याबा ताला वा ?