तामाङ हयुल्बाला भौगोलिक इतिहास नाम्सा हिन्ना । भू-विकटताला कारणसे लासी हयाङला हयुल्वाला मौलिक चलन कादे नाम्सारीन ताबा ताला । एफ.एम./रेडियोरीक्यार गेताङ स्हेङबा कादेसे नाम्साला मौलिक काईला अनुशरण लावारी खाम्तोला ओम सेतोला । तिल्दाविसाम याम्वुला आधुनिक डाङडुङ लाबासे टासी नेपाली तेन अंग्रेजीला लयरी रेडियोरीक्यार तामाङ ग्योइ पाङसी, नाम्सानाम्सारीमारलासमा चारजुकुदा ल्हुसी स्हयान्दो समाचारदा प्राथमिकता पिन्बा गेताङजुकु वास्तवरी तामाङ मौलिकताग्याम्से जहिलेन थारेङ ताला ।

दातेदोनामा च्यामा जतिवटा तामाङ हयुल्बादा बिदासी ठ्वाङबा रेडियो गेताङकादे मुला । थे बेनान याम्बु पोकोलन्हाङरी जेगेन सीमित ताबा म्राङबा मुला । फ्रिक्वेन्सी मोज्युलेसनग्याम्से तरङ्गति ताबा एफ.एम. रेडियोकादे नाम्सारीमार ओदे निना ङ्न्याँबारी आखाम । सरकारी कयमला रेडियो नेपालरी प्रसारण ताबा समाचारला तिलाइनोन मतलब आरे । तिल्दाविसाम तामाङ ज्योइरीजे समाचार प्रसारण तासी आता थे समाचारकादे तामाङ हयुल्वान्हाङला तादोला । रेडियो नेपालरी प्रसारण ताबा समाचारदा ज्यानालासी गोइ विसाम थे स्याङला कार्यक्रम आहिन । तिल्दाविसाम स्हयान्दोसे पाङसी जिन्बा स्हयान्से तयार लावा समाचारदा तामाङ ज्योइरी अनुवाद लासी प्रसारण तावा चुराङबा समाचारदा तामाङ साङग्युर बिसी पाङबारी ताला - 'चु रेडियो नेपाल हिन्ना तामाङ ग्योइरी फलानाग्यान्से तामाङ समाचार ङ्याँन्स्हयुगो ।' चु हयाङसे जहिलेल ङयाँन्सी खावा समाचार हिन्ना ।

चु समाचारदा तामाङला समाचार ओम तामाङला वास्तविक गेताङ हिन्ना बिसी पाङवारी खाम्ला - तामाङ ग्योइरी अनुवाद लासी तामाङ तामजे पाङसी तामाङ ग्योइरी समाचार प्रसारण लासी जेगेन तामाङ ग्योइला प्रगति आता । चु तामरी छार नेपालला अभियान थोसी ब्रापा राजनैतिक म्हिकादेसे ज्यानालासी गोबारी खाम्दोला । ह्युल तेन ह्युल्बादा छोनी लावा मुख्य माध्याम मिडिया ताबासे लामा मिडियारी ठिबाकादेसे तामाङला प्रतिनिधित्व लासी गेताङ स्हेङदोला । नाम्सा नाम्साला समाचार तेन तामसुरकादेदा गिक्छा प्राथमिकता पिन्सी तामाङ हयुल्वाला लागिरी सचेतना पिन्बारी रिवा मिडियाकर्मीकादेसे खाव्वाईविमा ङहाँच्छा मिडियाग्याम्सेन भू-विकटतान्हाङरी मुबा नाम्साकम्साला तामसुरकादेदा समाचार स्होसी प्रसारण लाबारी खाम्दोला । चु तामाजे हयाङला हयुल्वाला उन्नति तेन प्रगति ताबारी खाम्ला ।

मान वहादुर मोक्तान (शिक्षक)
बुद्व कोल्दोङ प्रा.वि.
तिमाल ठूलोपर्सेल, मोक्तानटोल काभ्रे