प्रसङ्गः २०६३ माघ लारी बौद्घरी स्हेङबा गिक्छा ल्होछार गेताङरी सहभागिता तासी ङा, विष्णु दोङआले ओम् श्रृजना गोले आङा नेपाल तामाङ घेदुङसे आयोजना लाबा ल्होछार गेताङ भृकुटी मण्डपरी गाडीरी क्रेसी निजी । चुनोन गुङरी विष्णु दोङसे - "ज्योज्यो तिनि राष्ट्रिय सभा गृहरी लेङस्याला सेमजो ला च्यारिटी शो मुला च्यागेले आता -" बिसी पाङजी । ङाई "एक त निमन्त्रणा आरे आर्कु विभा टिकटएन आरे ।" विसी पाङजी ।

"ज्योज्यो ! चिन्ता लास्हयुआदो बेनान ह्याङलान ज्योज्यो आलेकादेन हिन्ना । दाबेन ह्याङमि पत्रकारऐन । पासला व्यवस्था तालामाले । हयाङसे तिलाई विवरण दुइतोजीनि ।" विष्णुसे पाङला ।

"आहिन् आले, ङामि भृकुटी मण्डपलान ल्होछार च्याला तिलाइ छ्योइकादेइनोन चुङबारी थान्दोजी ।" चुराङबान ल्होलो ल्होलो तामकादे तानातानान ङानी रत्नपार्करी स्हाङ दोला । राष्ट्रिय संभागृहला ग्यालाम चुङबान ङानी भृकुटीमण्डपरीक्यार ह्राङला गोङमाकादे ल्हेला । चुनोन दुइरी ब्रानाब्राना विष्णु दोङ सुब् म्हाला ओम लिच्छा दाबेन ह्रुपताला - ङाई, आले ए खालाङ म्हाबा ओम ? बिसी ङ्योइमा थेसे मुसुमुसु नेवान पाङला - "ज्योज्यो 'लेङस्याला सेमजो' च्याबारी खाबा ह्रोकादे ह्रुप ताजी थेतासी.......।"

ओम ङानी बेनान भृकुटी मण्डपला ल्होछाररी सहभागिता तानिजी । चुनोन गुङरी याम्बुरी ग्लीङ ताइमा कुनु 'लेङस्याला सेमजो' ला निर्देशक सञ्जय बलसे विष्णु दोङदा स्वयम्वुरी मुबा निर्माताला रेष्टुरेन्टरीन फिल्म ओन्जीम । चु ताम विष्णु दोङसेन पाङबा हिन्ना । म्राङबा हिन्बा देन्बा तामदा थेनिला कमिकमजोरीकादेदा औल्याप लाबारी उदयमान पत्रकार विष्णु दोङदा थेसे गे लाबा स्योस्यो छयोर्तेनदा लागिरी चु ताम मसला दोबान ताजी । थेसे फागुनला 'छयोर्तेन' स्योस्योरी - 'फिल्म वनाएर कहिल्यै नथाक्ने निर्देशक सन्तलाल घिसिङ' बिभा शीर्षकला लेखरी सञ्जय बलला विषयरी तिलाइ ताम थान्सी ख्लाजी । थेरी चितवनला निर्देशक शन्तलालला तिलाइ प्रशंशा ओम काभ्रे तेमालला सञ्जय बलला आलोचना मुबा । स्यास्यो थोन्जी । थेरी ङालाई लेख मुबासे लासी छयोर्तेनला डिक्खेन/तेबा वीर वहादुर वाइबाग्याम स्योस्यो यारी लासी ङ्यासे तामारीक्यार ङानी बेनान दिम दिमरी निला ।

स्योस्यो थोन्बा न्हाङगार दाङसे ङा अफिसरी दोसी स्हयोला ११:०० ङ्हृयामारीक्यार पत्रकार श्रृजना गोलेला मोबाइल ९८४१५३२९७५ री डायल लाजी । श्रृजना आङासे मोबाइलग्याम जाजाबा काई तेबान "ज्योज्यो, फ्याफुल्ला" बिसी पाङजी । ङाई, ए खालाङ ओम ? बिसी ङयोइजी । थेसे ज्योज्यो, ङानिमी बनेपारी निबाइकेन मुला ।" बिसि पाङजी । ङाई दावेन सात्तालान ह्राङ लासी श्रृजना आङादा तिला मुलोम फूर्ती फार्ती ? विसी - ङयोइजी । थेसे - "तिला मुस्योम ज्योज्यो तिनिम यो हयान्देन विष्णु ज्योत्दा धम्की खाबाला खाबान मुला । सुत्तु, ए खालाङ मुला ? योना चुरी फलाना ग्लारी दोगाउ एसे स्योस्योरी तिल्दा थेराङबा ताम व्रिभा ङाइ, "ए थेराङबा ह्वा ?" विमान फोन थान्जी । अफिस छुटाप ताइलाबा दुइरी दाबेन ङाई श्रृजनादा तिरेम मोवाइल लासी च्याला । दोसीन विष्णु दोङदा दोहोरयाप लासी ल्हामान मिनग्याम धम्कीला फोनकादे खावा विभा ताम थाहा याङला ।

सेमरी दिक्कैनोन ताजी । न्हाङगार दाङसे यो सम्पादक वीर वहादुर वाइवाइनोन थेनोन धम्कीला ताम थोसी ङा ह्रुप तागाला । झन ग्रेन दिक्क ताबान "ङादा सेमन्हाङरी चुराङबा तामकादे म्हान्बा प्रशंशासेम म्हिदा न्होङला लाला । आलोचना लासाम गा म्हि सुधार ताबा मौका याङलोम । हयाङला तामाङ ह्युलरीजा तिल्दा चुराङबा ताबा ?.....।"

दुई ओराङनोन निजि । तिलाई दिनलिच्छा दोसीन बौद्धला पृथ्वी हल टुसालरी 'लेङस्याला सेमजो' ओन्बाइकेन मुला थे फिल्मला टिकट चुङसी ङाइऐन ह्रो लावा मुला विसी वीर वहादुरसे ङादा जानकारी दोन्स्हयुजी ।

२०६३ साल चैत्र १६ गते कुनु ङा योरी ङा दिमरिन चाबा स्होसी टिबा मुबा । दाल तेन कान मिन्साइ तरकारी मिन्बारी बाँकीन मुबा । छयोर्तेनला सम्पादक वीर वहादुर वाइबाला फोन खाजी । "फिल्म च्याबारी, दोगाबारी अहिन ओम ? शुरु ताइलाजी । तिल्दा आदोगाबा ?" र्ङाई "ए तिनि हिन्ना र ?" ल ल ङा दारेम तुरुन्तन खाला बिभान फोन
थान्ना । ङा हतार हतार कान चासी क्वान क्वानसी बौद्धरी निला । हल गेटरीन वीर वहादुर वाइबा ज्योज्यो र्ङाई स्याप्ला ओम ङानी, फिल्म च्याबारी चुला ।

लेङस्याला नाम्दर
फिल्मला पर्दारी म्हेतो ङ्हाँ जामेकोला म्राङला । गोर्की फ्युक्पोला जामे ओम गोर्कीजा प्राङबोला टुहुरी जामे । चु ङ्हीनोन लेङस्या टिम बिभा ताम थेनिला सम्वादग्याम ङोसेला । दुइला चक्ररी थेनिकादे ग्रेन तासी छार्बा म्राङला । तर दुःख सुखरीजा बिसाम थेनिगुङरी ह्रो आलाबा म्राङला । फिल्मला शिर्ष अनुसार नाम्दर डिक्पाजा आम्राङजी । च्याना च्यानान फिल्मला शीर्षक अनुसारला नाम्दारकादे आखामा सेमरी बोरऐ म्हान्जी । ङाई थे फिल्मला तिलाइनोन नाम्दार गोबारी आखाम्जी । ओराङनोन थेरी एकाएक जातुगुला दुइरी लेङस्या स्होबा तामाङ हयुल्वाला सामाजिक मान्यतादा ङहाँच्छा बोर्बा परम्परागत भेषभूषारी लेङस्यास्होबा कादे सजापताबा दृश्यरी टिबा म्राङला । थेनी खेब्बा खुइ तेन जतुगु हयान्देसे ब्योनदोनाला ह्रोकादेला भीड म्राङला । पर्दान्हाङरीन गाप्सी टिबा लेङस्याकादेसे गीसेमगिरी टिका थान्बा ताला । लिच्छा पर्दा ठवाङला ओम लेङस्या स्होबा ङहीरीन गिसेमगिरी फ्याहा लाला । लेङस्या स्होबारी थान्बा आइरक थेरी दोगाबाकादेसे लास्सो बिभान थुङबा दृश्य म्राङला । चुल्ला बेनान ताम गोमा तामाङ हयुल्वारी प्रचलित लेङस्या स्होबा परम्पराला दृश्यादा क्यामरारी युबान चु फिल्मला सफलता टिम बिभारी तिलाइनोन फरक आता ।

लेङस्या स्होमा सुताईनोन लामा (पुरोहित) कादेसे छयोइ (किताब) डोसी धार्मिक मंगलाचरण लाबा गजबला दृश्य ङाई याङजी । चु फिल्मरी तिल्दाविसाम 'लेङस्या' वा 'लेङ' स्होबा लामा पुरोहित थान्बा चलन न त ङाई खालाङरीइ म्राङबा मुबा न खालाइसेन ङादा पाङबा मुबा तर 'रीति थिति भूले तिमाल जानु' बिभा उखान ह्राङबान तेमाललान तामाङकादेसे स्होबा फिल्मग्यामसे चुराङबा ताम ङाई लोप्जी ।

लेङस्याला सेमजो नारी प्रधान तामाङ फिल्म तासाइनोन लेङस्याला भूमिका फिल्मरी खासै आम्राङजी । ल्होलोल्होलो पात्रकादेला छ्यालाङ छ्योलोङबा भूमिकारी द्वन्दला अहंम भूमिकाकादेला दृश्य ओन्बान फिल्म जिन्बा ताला ।

मूल्याड्कन
सञ्जय लामा बल ह्राङबा व्यक्तिला आकाङक्षासे तामाङ हयुल्बारीन टिसी तिलाइ लाइ ओम हयुल्वारी तिलाइ पिन्गे बिभा भावना तासी स्होबा 'लेङस्याला सेमजो' फिल्म व्यावसायकि रुपरी लगानी रेबारी खाम्ला ताला । तर चु फिल्मला शीर्षक ज्याबा मुसाइनोन फिल्म ब्रिभा लेखक तेन निर्देशकजुकुसे थेरी क्लाङबा कलाकार/पात्रकादेदा ज्यानालासी ह्रुप्सी ङहाच्छा बोर्बारी ओम असफल ताबा म्राङला । चुस्से लासी फिल्म च्याबा दर्शक तेन समीक्षकजुकुसे ज्याबा विभारी पक्कान आखाम्बा हिन्ना । तर फिल्मरी निर्देशक सञ्जय लामा बलला भिलेन (खलनायक) दोबा तिलाई दृष्यला थेला काई सेजा बिसाम निर्देशक विमाइनोन सञ्जय लामा बल कलाकार दोबारीजा उत्तम ताला ह्राङबा सेमरी छोर्ला ।

लिच्छारी
सुनपति थेत्माइसे तामाङ कथानक फिल्म 'लेङस्याला सेमजो' स्होसी छार कलाकारकादे उत्पादन तेन तामाङ फिल्म स्होबा ताङरी गोर्की इट्टा काप्पा ज्याबा गे लाबा मुला । चुल्ला लागिरी सुनपति थेत्माइदा थुजेछे फुल्नोनदोला । तर खालाई लेखक ओम पत्रकारसे समआलोचना लाजी वितेमा थेदा धम्की पिन्बा ओम थेफिरी आक्रमन लाबा तामजा विसाम शोभनीय ज्याबा ताम अहिन । चु ताम ज्यानालासी गोतोबा जरुरी मुला । थेदासि चुराङबा पाङबा लाबा मुला - "आलोचना लाबा ह्रो बिमाइनोन प्रशंशा लाबा ह्रो खतरानाक (घातक) ताबारी खाम्ला ।" चु ताम बेनासेन गोबारी आबश्यक मुला ।

प्रस्तुति- रविन्द्र तामाङ
दोबा- सिनेम्हेन्दो