तामाङ ग्योइला फिल्म मयुङ बुरिङला निर्माता कर्मा घिसिङ थेनोन फिल्मरी तुन्बा भूमिकारी अभिनय लासी कलाकारिता थुमरी वाङस्हृयुबा हिन्ना । शन्तलाल घिसिङला निर्देशनरी स्होबा फिल्म आक्ताङराव री मुख्य भूमिकारी क्लाङबा कर्मा घिसिङदा पाङतोमा म्हेतोगी उत्साही कलाकारिता थुमला म्हि हिन्ना बिसी पाङबारी खाम्ला ।

काभ्रे जोङरी मुबा कानपुर गा.वि.स. वडा नं. डु गाङनाम्सारी वि.सं. २०२४ साल असोज ११ गते आपा शेर बहादुर घिसिङ तेन आमा पाल्मो दोङला कुग्याम केवा किन्स्हृयुबा कर्माला कलाकारिता फिल्म थुमग्याम्से चुबा म्राङसाइनोन थेला लगाबजा बिसाम हवाइसंगीतनोन हिन्ना । हृवाई कोबा, हृवाई ब्रिभा ओम ह्राङसेन हवाई तेसी खाबा थेसे खाब्बाइबिमा ङहाँच्छा २०६१ सालरी 'हृयाङला सगुन' बिभा हवाइला एल्वम तेस्हृयुबा मुबा । ल्हामान स्रोताकादेसे सेम लाबा चु एल्बमग्याम्सेन कर्मा घिसिङदा झन ल्हामा हवाईसंगीतरी ङोसेबा हिन्ना । जहिलेन नेसी टिबा कर्मा घिसिङ सहयोगी म्हिअेन हिन्ना । तामाङ हृयुल्बान्हाङरी टिसी खाबा तामाङ ज्योज्यो आले आङाकादेदा ह्राङसे खाम्बा दोनाला आर्थिक, भौतिक तेन नैतिक सहयोग लासी खाबासे थेदा सहयोगी बिभा हिन्ना । ह्राङ कलाकारिता थुमलान म्हि तासाई थेसे कलाकारितादाजा बिसाम पेशा स्होबा आरे । ज्याबा खालला ह्वाइला छिग ब्रिबा, ज्याबा संगीत ह्राङसेन युबा ओम ह्राङला बेनादन सेम निबा सुमधुर काईला फ्युक्पो कर्मासे चु थुमदान पेशा स्होबारी खाम्साई थेसे ह्राङला पेशाजा बिसाम स्हयान्दोनोन चुङबा मुला । थेसे लिच्छाला ताङरी २०६३ री ह्राङला काइतेन संगीतरी म्हेन्दो एल्बम बजाररी बासी जिन्बा मुला । छार काइमो बबिता पाख्रिनदा यारी थान्सी तेबा चु एल्बम बेनासेन सेम ताबा म्राङबा मुला ।