सिन्धुपाल्चोक जोङला थिङ टोलरी वि.सं. २०१३ री म्हेतोगी च्याङबा केबा ताला । गोलेसे गोलेसे दुईसे थेदा ब्योन दोना लाला । नाम्साखिम्सारीक्यार ताबा ब्रेल्बा गेताङ, छेवार ओम जात्रा प्रिपा ह्राङबाकादेरीक्यार थे दोबा ताला । थेसे तामाङ डम्फुरेकादेसे आम्मैले होईला भाकारी डम्बा ह्राब्सी ख्वार-ख्वार स्याबा म्राङसी ल्हामान थेला सेमरी थुर्बा ताला । तिला तामाङ, तिला मगर, तिला क्षेत्री खाल्दामानसे बाबा थेराङबा प्रीपा तेन जात्रारीक्यार ह्वाइ कोसी ब्राना ब्रानान थे २४ दिङला लक्का ब्योन ताला ।

चु दुइरीन कलाकार भैरब बहादुर थापा साँस्कृतिक गेताङला लागिरी कलाकार म्हाइबारी सिन्धुपाल्चोकरी दोगाला । लक्का ब्योन तामाङ च्याङबा ब्योनकोल्से कोबा सेलो ह्वाई थेसी थेला सेम थुर्ना लाला । ओम थेदा ह्रुप तासी ताम लासी कलाकारला रुपरी दाम्सी थेदा याम्बुरी बोर्ला । कलाकार थापासे ग्ले महेन्द्रला ङोन्छाङ हृयुल तेन हयुल्वाला लोक साँस्कृतिक गेताङकादे ओन्ना । थेरीन तामाङ च्याङबा थे ब्योनसे ग्लेला याग्याम्से सान्त्वना पुरस्कार स्याब्ला विसाम आर्कु अवसर बिभा रेडियो नेपालग्याम्से लोक हवाई कोबारी याङबा ताला । 'मुलाको चना हृवाई नाना', 'लौन हजुर के गरौ नक्कली पातलीलाई कसरी बिहे गरौं', 'कलकते काइयो केश मेरो बाङगो' ह्राङबा ब्रोइखाबा लोक ह्वाइकादे थे सिन्धुपाल्चोकला च्याङबासे रेडियो नेपालरी कोबा अवसर याङला । सुर ताल विनाला ज्ञानसे नेपाली हवाई संगीतरी चुनोन ब्योन च्याङबा जयनन्द लामा बिसी ङोसेना लासी तहल्का मच्चाप लाला ।

बेनालान ओन्छाङ चर्चित तासी जिन्बा थे सिन्धुपाल्चोकला च्याङबा ब्योन कोला जयनन्द लामाला डोबाला ताम लातोमा थेसे म्हिला दिमरी गे लाबान डोबान लासी याम्बुला पद्मोदय हाइस्कुलग्याम्से एस.एल.सी लाबा हिन्ना । जाजामा ह्यान्देन थेला सेम निबा विषय हवाई संगीत ताबासे एस.एल.सी. लिच्छा क्याम्पस डोबा ताङरी संगीत विषय किन्सी डोबारी ललितकलारी वाङजी । तिलाई रे लिच्छा चु थुमरी निरन्तरता पिन्सी जयनन्दसे संगीतरी स्नातक लाजी । चुनोन ताङरी संगीत प्रविणला रुपरी ङोसेबा नरराज ढकालसे ग्रेन माया लाबान ऐसे लोक ह्वाइनोन कोतोला हया - बिदासी मोलाम पिन्बा मुबा ।

सिन्धुपाल्चोकला चु च्याङबा जयनन्द लामाला संगीत यात्रा झन झन ब्लासी निला । जयनन्द लामासे प्रज्ञा प्रतिष्ठानरी समेत जागिर याङ्ला । जागिर लाबान साँगीतिक गेताङला सिलसिलारी थेसे नेपालला ७५ वटा जोङरीक्यार लोक संस्कृति तेन ह्वाइला ब्यापक खोज, तेन अनुसन्धान लासी ल्हामान ह्वाइकादे कोसी ब्राबा अवसर याङला । थेसे ल्हामान नाटक तेन टेलिचलचित्रजुकुरीक्यारअे ह्राङला जाजा भूमिकारी अभिनय लाबारी सफल ताला । सांगितिक थुमग्याम्से रंङ्गकर्मी (फिल्म क्लाङबा) दोबा जयनन्ददा ओदेसेजे सेम आनिजि । दारेम थेसे ह्राङसेन फिल्म स्होबा ओम निर्देशन लाबा गेताङरी लगाब ताबा ताला चुला । ह्राङला ग्योइदा माया लाबान जयनन्दसे ह्राङलान आमाग्योइला फिल्म स्होबा सेम तासी खाप्पाइबिमा ङ्हाच्छा तामाङ ग्योइला फिल्म 'सेमरी छोरङान' निर्माण तेन निर्देशन लाला । चुनोन फिल्म तामाङ ग्योइला खाब्बाई विमा ङ्हाँच्छा स्होबा फिल्मला रुपरी दोङरापरी टिना लाबारी जयनन्द लामा सफल ताला ।

प्रस्तुतिः रसिला तामाङ
दोबा: सिनेम्हेन्दो