तामाङ सञ्चार थुमरी सञ्चारकर्मी जगत दोङ खालाइसे थाहा आताबा मिन आहिन । क्याम्पस डोबा दुइ ह्यान्देन ह्राङला ह्युल तेन हयुल्वाला लागिरी चिन्तन तेन चासो किन्सी खाबा सञ्चारकर्मी हिन्ना जगत दोङ ।

पाङनोन तोमा सञ्चारकर्मी जगत दोङदा चु दुइला सक्रिय पत्रकार विसी पाङबारी खाम्ला । क्योलोलोला ब्योन ल्हुइला गाङसाल दिङ सुतान ताला आस्याब्बा जगत दोङला योगदान तेन् गेताङसे लासी थे चर्चित ताबा हिन्ना । हिन्बाम ह्वाई कोसी ब्योन स्होसी स्टेज प्रोग्राम जुकुरीक्यार बेनाला ओन्छाङ ह्राङला स्ह्याल ओन्सी ओम फिल्मरीक्यार क्लाङसी जेगेन म्हि चर्चित आता । म्हि चर्चित ताबारी नेता, मन्त्री ओम संगितकार थुमरी वाङसी हिरो अथबा कलाकार नोन दोआतोबाटीम तामाङ ह्युलबा न्हाङरी तामाङ ज्योज्यो आले तेन नाना आङाकादेला गुङरी रेडियो गेताङ स्हेङसी रेडियो ङयान पुङसी ह्राङसे सेबा दोनाला ज्ञानगुणला ताम गिसेम गिरी देप्सी, ह्राङसेनोन लोप्सी स्ह्यान्दाइनोन सेवा दोनाला लोप्सीनाम बेनालान तिङ्ला ढुकढुकी दोबारी खाम्ला । ओम बेनाला ओन्छाङ ङोसेबा म्हि दोबारी सफल ताबा टिम बिभा तामला ज्वलन्तः उदाहरणला रुपरी जगत दोङदा याङबारी खाम्ला । ब्रे दिङ ङहाच्छा ह्यान्देन एच. वि. सी. एफ एम. ९४ मेगाहर्जरी हप्ताला ङ्हिरेम तामाङ ग्योइला गेताङ स्हेङसी खाबा जगत दोङसे दाते खासी तामाङ ह्युलबाला जेगेन चिन्ता आलाना क्योङ आदिबासी जनजातिन्हाङला हयुल्वा कादेदाइनोन डान्सीनाम ज्यार्दी ग्योइला गेताङ 'जनजाति आवाज' बिभा गेताङ काब्बा मुला । चु गेताङरी टिसी जगत दोङसे क्योङ आदिबासीजुकुदा चेतना, सन्देश तेन थेनिला काइदा बुलन्दा लाबारी सफल ताबा म्राङबा मुला ।

रेडियो/छापा पत्रकार जगत दोङदा च्यामा म्हेतोगी उत्साही ओम ह्राङला क्योङ ल्हुइनोन ब्याङसी ब्रापा पत्रकारला रुपरी किन्बारी खाम्ला । दिमरी यो डोङरेसी चिया थुङबारी सुतान फुर्सद आताबा जगतदोङसे योला प्रायः ब्रेकफास्ट तेन लन्च लाबाला तिलाई ठेगान आता । दिनभर खाइमा रेडियो, खाइमा स्योस्यो बिसी ब्रापा जगत दोङ दिमरी खाप्बा दुइरी दोला बिभा तामला ठेगाननोन आता । हिन्बाम दिमला बेनान गेताङजुकुरी ह्राङला ल्हुइला ह्रो सञ्चारकर्मी मायालु ङेसुरसे ह्रो लासाइ पारिवारिक टेन्सनकादे नासी नासीन सञ्चार थुमरी व्यस्त ताबा मुला । चुरी सञ्चार थुमरी जगत दोङसे जति योगदान पिन्बारी खाम्बा मुला । थेला लिच्छा ल्हुइला ह्रो मायालु ङेसुरला ग्रेन या मुला बिदासी पाङबारी खाम्ला । चुनोन मौकारी जगत दोङ तेन मायालु ङेसुरला विषयरी म्राङबा तिलाई ताम लातोमा मायालु ङेसुर ह्राङबा तामाङ ह्युल्बान्हाङरी बेनासे ङोसेसि जिन्बा सञ्चारकर्मी तिल्दा दिमन्हाङरिजे सिमित ताजि ? हिन्बाम पारिवारिक बाध्यताला कारणसेनोन ताबारी खाम्ला । न्हाङरी तिल्दामान मुसाई फिरक्याप टिसी च्यामा जगत दोङला गाङसाल गेजुकु मायालुदा पिन्साम जगतदाईनोन जाकार आराम लाबा फुर्सद तासेलावा बिबारी खाम्ला । लाखौ तामाङ ह्युलबारी च्याङना संख्यारी मुबा नारी सञ्चारकर्मीन्हाङरी स्थापित तासि जिन्बा मायालु ङेसुर ह्राङवा प्रतिभाबान सञ्चारकर्मी जामेकोलादा दिमन्हाङरी च्युप्सी थान्बा ल्हामान दुःखला ताम हिन्ना । चुरी व्यस्त सञ्चारकर्मी जगत दोङला तामला सर्न्दभ लासी मौकारी मायालु ङेसुरला विषयरी जाजाबा ताम काब्बा हिन्ना । तिल्दाबिसाम प्रतिभाशाली जामेकोला सञ्चारकर्मी मायालु ङेसुर ह्राङबा सञ्चारकर्मी तामाङ ह्युल्बारी खाँचो म्राङबासे चु प्रसंग थुइबा हिन्ना ।

चु दुइरी साँच्चिन पाङतोमा मायालुला बिमाइनोन जगत दोङलान ताम लातोला । तिल्दा थेदा व्यस्त सञ्चारकर्मी बिजि बिभा ताममी बेनासेन था मुला । रेडियो गेताङ स्हेङबारी खाराङ लासी दुइ पिन्बा मुग्याम बिभा तामला छ्यामरी थेला यारी लाला ङ्हिरेम थोन्बा ताम्सालिङ स्योस्यो मुला । लाला तिरेम स्योस्यो तेबारी सुताइ थोपो रितोबा अवस्थारी तिला लासी लाला ङ्हिरेम थेसे स्योस्यो तेबारी खाम्जी ताला बिभा ताम ह्राङलान ग्लारी मुला । खास चु बिभा थेला सक्रियता, निरन्तरता ओम लगनशिलताला कारणसे लामा हिन्ना । जुंगा दारी सुतान ज्यान आखाबा युवा सञ्चारकर्मी जगत दोङला बामरी मुबा गेताङकादेदा च्यामा थे गान्बा अविभावकला ताङरी म्राङबा मुला । ह्राङदा स्योङ म्लेसी ह्राङतेन ह्राङला ह्युल्बादा लागिरी ब्रापा चुराङबा समाजसेवी सञ्चारकर्मीदा बेनासेन सम्मान लातोला । लिच्छारी जगत दोङसे लाबा बेनान गेताङजुकुन थेसे ब्लाप्पा न्हाबा चौतारी हिन्ना बिभा ह्याङसे म्हान्बारी खाम्ला । दाते काभ्रे जोङ ग्याम्से प्रसारण ताई लाबा छार रेडियो स्टेसन 'नमो बुद्ध एफ.एम.' लाइनोन ह्राङसेन नेतृत्व लाबासे लामा व्यस्त पत्रकार जगत दोङ दारेम कादे व्यस्त तासी निला बिबा झन खुल्दुलीला ताम मुला ।

प्रस्तुतिः- सिनेम्हेन्दो