ज्योमोगाङ नोन स्हेथ्थीला ह्राङबा नोबा सेम थोसी मकवानपुर राई गाउँग्याम्से याम्बुरी डोबारी खाबा हिरालाल ब्लोनसे हा्रङ फिल्म थुमरी क्याल्बारी म्याङला बिभा म्हँङ खाइमाइ थोबा आरेबा मुबा । तार वर्ण ५ फिट ३ इन्च नोबा हिरालालला जिउला तौलजा ६५ किलोला मुला । आकर्षस जीउडालला फ्युक्पो हिरालाल निर्देशक सन्तलाल घिसिङला संगतसे तामाङ फिल्मला ग्योइरी प्लुम निबा हिन्ना ।

'आक्ताङराव' तेन् 'च्याङबा' ह्राङबा फिल्मकादेरी शिर्ष नायक दोसी अभिनय लासि जिन्बा हिरालाल ब्लोन कलाकार दोला बिदासी नाम्सारी मुबा आपा राम बहादुर ब्लोन तेन आमा ललिमाया रुम्बादा तिलाइनोन था आरेबा । हेराङला एकान्तकुनारी गोर्की कोठा किन्सी याम्बुला सिग्मा क्याम्पसरी विविएस डोसीटिबा हिरालालला आपा, ज्योज्योआलेजुकु फ्युक्पो ताबासे हिरालालला याम्बुला हिडाइ तेन पढाइऐन ज्याबान मुला । म्लाङ हिरो होण्डारी क्रेसी मिरी म्लाङ चस्मा ख्लुम कुसी बाईकला लिच्छा ह्राङलान फिल्मरी क्लाङबा हिरोनी थान्सी ब्रापारी म्याङबा हिरालाल ब्लोनला बेनान दुइकादे सुखद मुला । विवाह लाजी कि आलाजी ? बिभा तामरी सत्य ताम पाङसाई स्योस्योरिजा सस्पेननोन थान्गो बिसी पाङबा हिरालाल ब्लोनला रेदाङसेन मंगलबाररी ब्रत टिसी खाबा अनौठो बानी मुला । विशेष लासी मञ्जुश्री लादा सेमरी थान्बा हिरालाल ब्लोन राजनीति तेन धार्मिक स्वभावला ऐनोन मुला ।

कलाकारिताला छ्यामरी रेडियो पत्रकारितारिनोन हिरालाल सक्रिय म्राङबा मुला । तिल्दाविसाम हिरालाल टाइम्स एफ.एम.९०.६ री सोमबार प्रसारण ताबा साप्ताहिक तामाङ ग्योइला गेताङ सेमला तामला छार प्रस्तोताइनोन हिन्ना बिसाम रेडियो पत्रकारितादा निरन्तरदा पिन्बा सेमसे थेसे दाते तामाङ सञ्चार समूहरी नोन आबद्ध तासी सदस्यता पत्र किन्सीजिन्बा मूला । कलाकारिता तेन पत्रकारिता एला खाब्बाजा ल्हामा रुचिला विषय हिन्ना ओम ? बिभा तामरी हिरालालला सुङताम चुराङबा मुला "कलाकारिता ह्रोकादेला संगतसे लोप्पासे लामा ङा चु थुमरी खाबा हिन्ना । ओम पत्रकारिता ङाला ङहाच्छाह्यान्देलान रुचिला विषय हिन्ना । थेताबासे चु ङ्हिनोन ग्यालाम चुङसी तामाङ तामाङ ह्युल्वान्हाङरी टिसी तामाङ ह्युल्वालान ओन्छाङ प्रिय म्हि दोसी समाजसेवा लाबा बिभा ङाला प्रतिबद्धता मुला ।" खालदामानतेन छ्याम शिष्ट तेन नम्र बचन लासी ताम पाङबारी सेबा हिरालाल ब्लोन दाते सन्तलाल घिसिङला नवौ फिल्म 'दुःङाल' ला शुटिङ जिन्सी टिबा मुला । चु फिल्मरी हिरालाल शिर्षनायकला भूमिकारी मुबासे लामा योनान तामाङ दर्शककादेसे हिरालालदा फिल्मला पर्दारी म्राङबारी खाम्सेदा मुला । ह्याण्डसम मुला या आरे फिल्मरीन च्यास्ह्युगो ह्या ?