गजल
खाई तिला लासी सोसे सेम सिमा हृयान्से
ह्राङलान बिबा म्हि स्यान्दो दोशी निमा हृयान्से
चु सेम सुखाबा औदिन म्हिला बचन थेसीमाम्
आतोबा आरोप ङा फेरी बिमा हयान्से
दिनएन ङादा म्हुन ह्राङ ताजी चु सेम क्रामा
जिन्दगी भर ह्रो लाबा म्हि कुटिसी टिमा हृयान्से
सेमला मिङली ताइसी ल्हुइनोन बाम्सीझिन्जी
ब्लाबारी आखन्नी थे पापीसे सेम खिमा हृयन्से
म्हि कादेला ताम ङ्यान्सी ङादान आज्याबा स्होजी
सोबारी आखाम्नि तिनी तिङनोन थिमा हृयान्से

सजना गोले "शैली"
काभ्रे २ सल्ले

ब्हाइखा
सार्बारी आम्याङनान पुँपुरी ताइपिन्जी
झिनो आशा ओन्छी ङादा अलपत्र लापिन्जी
साहार किन्छी स्वसेला आशा मुबा ग्रेन
मायाल येल डानसी ल्काङजी ङा निर्दोष थेन
यातना ङादा घात पिन्जी मिनाङ मिख्ली थोपुङजी
छयाम नोन सोसी सिदोबा एला ग्रान खालाङ निजी
झुट्टो मायाला नाटक ओन्छी छोबगला स्योङरी ब्योङजन लाजी
ज्याबा जेबाला माङ तिनी चकनाचुर लापिन्जी
तै पनि ङा ङाम्सेला आरे दुःख तागै एदा सुख न सुख
स्बार्था चु युल्सारी स्बोबारी ङा लाबागेन मुला दुःख
ज्याबा डान्बा मुला सदा सफलताला ज्योम गाङरी दोगो
ङाइ पिन्बा निश्चल मायादा ङन्सी खैमाई ए आक्रागो ।।

बिक्रम लामा वाइबा
माहांकाल चौर -३ गोलगाउँ
काभ्रेपलाञ्चोक, नेपाल