दात्ते च्यामा ह्याङला तामाङ ग्योइला फिल्मकादे ल्हेसी निबा म्राङबा मुला । चु बिबा ह्याङला गर्वला ताम हिन्ना । सयौं कलाकारकादेसे ह्राङराङला ग्लारी टिसि चु थुमदा योगदान पिन्बा मुला । ह्राङला वास्तविक लीदा पर्दारी ओन्सी तामाङ ह्युलवादा सचेतना पिन्बा ग्रेन गेताङकादे कलाकारग्याम्से ताबा मुला । चु थुमरी टिसि गे लाबा निर्देशक, निर्माता, ओम कलाकारजुकु अवश्येन ह्याङला ह्युल्वाला खाब्बाइबिमा ग्रेन सम्पति ओम गहणा हिन्ना । चुनिकादेदा ह्याङसे सम्मान तेन माया पिन्तोला । चुनिकादेसे लाबा कलाकारिताला समीक्षा लासी प्रगतिला ग्यालाम ह्याङसे ओन्तोला ।
चु सिनेम्हेन्दो स्योस्यो चलचित्रला तामदा वस्तु स्होसी तेबा प्रयास ङाई लाबा मुला । चुथ्थेबा तामाङ फिल्म थुमरी गोर्की सुत्ताई तामाङ फिल्मला विषयरी जोड पिन्सी तेबा तामाङ स्योस्यो आरेबासे लामा बेनालान आकाङक्षा ओम सेमकादेदा गोसी चु सिनेम्हेन्दो ङाई बाजाररी बापा हिन्ना । चु ङाला एकल निर्णय तेन विचारसे जेगेन स्योस्यो तेबा आहिन । ङाई चु स्योस्यो तेबा बिमा ङहाच्छा तामाङ ह्युल्बान्हाङरीन गे लासी स्ह्युबा अग्रज पत्रकार ज्योज्यो रविन्द्र तामाङ, ङादा पत्रकारितारी खाब्बाइ बिमा ङ्हाच्छा रेम प्रेरणा पिनस्ह्युबा ज्योज्यो रुद्रसिंह तामाङ ओम छयामरी खाब्बाइ बिमा ल्हामा तामाङ फिल्म स्होस्ह्युबा निर्देशक ह्रो सन्तलाल घिसिङ, निर्देशक दीपेन्द्र दोङ तेन प्रकाश ब्लोनदाइनोन ह्रुप तासी ङाई सल्लाह सुझाव किन्बा मुबा । थेराङनोन लासी चर्चित नायक सन्दिप स्याङतान, उत्कृष्ट अभिनेत्री नायिका चाँदनी मोक्तान, तामाङ फिल्मरी खाब्बाइ बिमा ल्हामा संगीत पिन्स्ह्युबा ह्रो संगीतकार कुवेरसिंह दोङ तेन छ्याम एन ङाई सिनेम्हेन्दो तेबाला विषयरी तिलाई ल्हेङमो लाबा मुबा । ओम चु ह्रोकादेग्याम्से स्योस्यो तेबारी ज्याबा सल्लाह सुझाब याङबा मुबा ।
चलचित्र, रङ्गमञ्च, संगीत ओम फेशन थोरी ब्रिबा चुराङबान आधुनिक खाल्ला स्ह्यान्दो स्योस्योइनोन खाबा रेकादेरीक्यार थोन्ना बिबा आशा ङादा म्हान्बा मुला । चु स्योस्यो तामाङ ग्योइरीन तामाङला रिमठिम, सेमल्हेङ तेन दोङरापकादेदाइनोन ग्ला पिन्सी निरन्तर प्रकाशन लासी निसेला मुला बिबा प्रतिबद्धताला छ्यामरी ह्राङनी बेनानला माया तेन सल्लाह सुझाब याङला बिबा ङादा म्हान्बा मुला ।
विष्णु दोङ तामाङ
डिख्खेन/तेबा
