ङी दर्जनबिमा ल्हामा स्होसीजिन्बा तामाङ ग्योइला फिल्मकादेसे गुणात्मक फड्को छेब्बारी आखाम्साई लाखौ तामाङकादेदा तिलाई सचेतना अवश्यन ताना लाबा मुला विसी हयाङसे सेमन्हाङग्याम्सेन गर्व लासी पाङबारी खाम्ला । हयाङला ग्योइला भाषिक निरन्तरता, धर्म तेन संस्कार-परम्परा ह्राङबा अमूल्य स्हेकादेदा छार युवाकादेला तिङरी मायाला ढुकढुकी दोनालाबारी, जाम्बुलिङरी तामाङला पहिचान ओन्बारी तामाङ ग्योइला फिल्मकादेसे ग्रेन भूमिका क्लाङबा मुला बिसाम तामाङ फिल्मरी क्लाङबा सयौ तामाङ कलाकारकादे, हवाई-सँगीत पिन्बा, कोबा ओम ब्रिबा स्रष्टाकादे ह्याङला तामाङ हयुल्वाला ग्रेन सम्पति हिन्ना ।

जतिनोन आधुनिक लाबासे टासाई फिल्म तेन ह्वाई संगीतरी मुबा कलाकारकादेसे आधुनिकताला छ्यामरी ह्राङला मौलिक ग्योई, धर्म तेन सँस्कृतिकादेदा खाइमा ह्राङला मौलिक परिवेश, खाइमा पश्चिमेली फेसन, हलिउड तेन बलिउडला सकारात्मक तौरतरिकाकादे नक्कल लासीन तासाई ह्राङला पहिचानदा सजाब लाबा, श्रृजना लाबा ओम तामाङला छुट्टोन पहिचान थान्सी खाबा मुला । चुरी हयाङ क्योङसे चु म्हान्तोला कि एकाइसौ शताब्दीरी दोगासी तामाङ कलाकारकादेसे पिन्बा योगदानदा खाइमाइनोन म्लेबारी आता । नाटय विधारी स्हयानदो हयुल्वाला पहिचान ओन्सी, थेरी तामाङ ह्वाइरी तामाङ छिगकादे तामाङ ह्युल्वाला दोराप पुइबा ओम तामाङ हयुल्वादा छार ग्यालामरी बोर्बा सचेतनामूलक तामकादे युबा मुसाम चुसे तामाङ हयुल्वादा जाम्बुलिङरी ङोसेना लाबा ह्राङला मौलिक जातिय अस्तित्वकादेदा धुइ धुइ दोना सोना लाबा छार बङ ओम छार ग्यालाम हिन्ना बिबा हयाङसे गोतोला ।

तामाङ फिल्मकादेला गुणात्मक फडकोदा ल्हेना लाबारी चु थुमरी वाङबा सयौ कलाकारकादेदा हयाङसे सम्मान लातोला । फिल्म स्होबा निर्माता निर्देशकजुकुदा सान्त्वना पिन्सी माया सम्मान लातोला । प्रायः कलाकारकादे रहरसे मिन चलापलाबारी फिल्मरी क्लाङबा, फिल्म स्होबा लासी खाबा मुर्साईनोन थे कलाकारकादेदा ह्याङसे सामाजिक रुपसे च्याबा प्रयाश लातोला । गोर्की कलाकारसे दुःख लासी फिल्मरी क्लाङला, गोकी फिल्मला नाम्दर ब्रिमा म्हिसे दुःखलासी नाम्दार तेन हवाई ब्रिला । निर्देशकसे निर्देशन लाला ओम संगीत पिन्बासे दुःख लासी संगीत पिन्ना । तिला चु बेनान थेनीकादेला व्यक्तिगत स्वार्थरी ह्राङला मिन चलापलाबारी जेगेन लाबा हिन्ना ओम - ओदासी हयाङला दारेम खाबा फिल्मकादे गुणात्मक ताना लाबारी थेरी क्लाङबा, चु थुमरी टिसी टु ब्याङवा ओम चु थुमदा ह्राङला व्यवसाय स्होसी निरन्तरता पिन्बा कलाकारकादेदा ह्याङसे माया लातोला । सयौ हयाङला कलाकारकादे मुला । थे सयौ कलाकारकादेसे छार जोश जाँगर थोसी फिल्म थुमरी वाङसी छार गुणात्मक फिल्मकादे स्होबारी खाम्गाइ । चुनोन ज्याबाडान्बा मुला ।

प्रस्तुतिः धनेन्द्र दोङ तामाङ