दातेला चर्चित गीतकार ओम सञ्चार कर्मी दीपेन्द्र दोङला ल्हुइला ह्रो हिन्ना कलाकार चाँदनी मोक्तान । भारतला सम्वलपुर जोङ उडिसा राज्यला सदरमुकाम हिराकोटरी आपा रामहरि मोक्तान तेन आमा फुल्मो दोङला कुग्याम सन् १९८४ -वि.स २०३७ साल) री केस्ह्युबा चाँदनीला पुर्ख्यौली दिमजा खनियापानी गा.वि.स भीरकोट रामेछापरी हिन्ना । जातुकु मुमाला दुइकादे ब्रिभा डोबा लासीन थोबा चाँदनीसे प्राथमिक तहला पढाई भारतरीन लासी बाँकी पढाइजा याम्बुला गौशलारी मुबा शारदा मा.वि.री लास्ह्युबा हिन्ना । थेसे चुनोन लोपखाङग्याम्से २०५६ सालरी एस.एल.सी. उतिर्ण लस्ह्युबा मुबा ।

झट्ट फिरक्यापग्याम्से च्यामा चाँदनी रुप, रंग तेन शारिरीक व्यक्तित्वरी कलिउड तेन् बलिउड फिल्मला कलाकारकादेबिमा कम्तिला आम्राङ । याम्बुरी लोपखाङ डोमा ह्यान्देन स्याबारी चुबा चाँदनीला कलाला प्रशंसाइनोन थे दुई हृयान्देन ताबा हिन्ना । चुरी चाँदनीदा केवा पिन्स्ह्युबा आमाला प्रेरणा, समर्थन तेन् मायासे लासी थे कला थुमरी वाङबारी सफल ताबा बिभा ताम था याङबारी खाम्ला । तिल्दाबिसाम चु प्रतिक्रिया थेनोन कलाकार चाँदनीला हिन्ना । चाँदनीदा कलाकारितारी वाङवा दुइला अविष्मरणीय तिलाई क्षण मुला ? बिसी ङयोइमा थेला चुराङबा प्रतिक्रिया मुला - "ङाई जातुगु मुमा ह्यान्देन ह्वाई कोबा तेन् स्याबारी ल्हामा सेम लाबा मुबा । ङाला कलाकारिताला अविष्मरणीय क्षण बिभा खाबाई बिमा ङ्हाच्छा रेम सार्वजनिक ग्लारी स्याबा दुइला हिन्ना । थे बिभा ङा डोबा याम्बुला लोपखाङला हिन्ना ।" ङाई दातेइनोन झिला लोपखाङरी अभिभावक दिवसला दिनरी ङाई ङालान कम्पोजरी नेपाली फिल्म 'युगदेखि युगसम्म' ला हिमाल झलल बिभा ह्वाइरी स्यामा लोपखाङला बेनान मास्टर, मिस तेन् लोपबोनह्रोकादे दंगदास तासी तालीसे स्वागत लाबा मुबा । जामाह्यान्दे ङादा कलाथुमरी ग्रेन हौसला खाबा हिन्ना । चु ताम गोमा चाँदनी मोक्तान जाजा मुमा ह्यान्देन कलारी तिब्बा टिम बिभा ताम था ताबारी खाम्ला ।

गोर्की कलाकारितारी चाहना मुबा म्हिदा सफलतारी दोना लाबारी समय परिस्थिति तेन् भाग्यला तामअे ताबारी खाम्ला । तर चाहना जेगेन सेमरी थान्सीइनोन तिलाई आता । चाँदनीसे ह्राङला सेमला चाहना कलाकारिता म्हान्सी लाजी । लोप्खाङ डोमा दुइ ह्यान्देन स्याबारी खप्पीस तासीजिन्बा चाँदनीसे ल्हामान याम्बुन्हाङरी ताबा स्टेज प्रोग्राम जुकुरीक्यार एन् बो किन्बा अवसर याङजी । २०५७ सालरी याम्बुला प्रज्ञा भवनरी ताबा राष्ट्रिय नाटक महोत्सवरी बो किन्मा चाँदनीला अभिनय म्राङसी नेपाली फिल्म थुमला वरिष्ठ कलाकार नीर शाह तेन् कृष्ण मुरारी ढुँगेल ह्राङ्बा म्हिकादे सुताइनोन ल्हामान प्रभावित तासी नीर शाहसे 'बसन्ती' री, कृष्ण मुरारी ढुँगेलसे 'नौ डाँडा पारि' री अफर लाबा मुबा तर दुइ आडिक्बासे लासी क्लाङबारी आम्याङबा हिन्ना बिभा चाँदनीला प्रतिक्रिया मुला ।

दारेम तिला ताजी ओम ?

२०५७ सालरी प्रज्ञा भवनरी ताबा राष्ट्रिय नाटक महोत्सवरी चाँदनीला कला, रुप-रंग बेनान म्राङसी प्रभावित ताबा दिपेन्द्र दोङसे जामान चुराङबा विचार लाजिम कि, चु मोक्तानला जामेदा मयुङबुरिङरी मुख्य नायिका पिन्तोला ओम तासाम चुत्दान ल्हुइला ह्रो स्होबा प्रयास लातोला बिदासी । थेसे विभा ह्राङनोन चाँदनीदा मयुङबुरिङरी मुख्य नायिकारी क्लाङपुङबारी दीपेन्द्र दोङसे अफर लानिला । क्योलोलोला ब्योन, विवाह लाबारी सुताई आतिबा दिपेन्द्रला प्रस्ताबदा स्वीकार लाबान दिपेन्द्र तेन थेनिङ्हीन्हाङरी ताम डिक्सी 'मयुङबुरिङ' री क्लाङबा निश्चित ताला । मयुङबुरिङला सुटिङरीन थेनिङ्हीला माया पिरति टिला । गोर्की मोक्तान, गोर्की दोङ । गोर्की नायिका ओम गोर्की निर्देशक । जातअेन डिक्पा पिरती लाबारीम झन डिक्पा । तामाङला गोर्की अचम्मला स्वभाव मुला । ह्याङला ह्युल्बारी तामाङ-तामाङ ह्रुप तासी परिचय लामा गोर्कीन धिमला थेमे ह्राङबा व्यवहार लाला । कुटुम्ब मुसाम तुरुन्तन ङोसी जालमाया लाबारी म्हाइला । ओम थर डिक्पा मुसाम पूर्व पश्चिम खालाङदामानला मुसाई ह्राङलान ज्योज्यो आले, नाना-आङा ह्राङबा व्यवहार लाबा चु गोर्की विशेषता मुला । थेदासी चुरी दिपेन्द्र तेन चाँदनीदा शुटिङला दुइरी माया लाबारी तिलाईनोन गाह्रो आताजी । मयुङबुरिङ अे जिन्जी ओम विवाहअे ताजी । ङ्होरीनोन ब्रिभा, बोरीइनोन थोब्बा बिभा ह्याङला गोर्की सुङताम मुला । चाँदनीला ङ्होरी दीपेन्द्र ब्रिभा दीपेन्द्रला बोरी चाँदनी याङबा । चु गजबला संयोग हिन्ना । बोरी दोगाबा स्हेदा खाल्से ख्लाला ? ङ्होरी ब्रिभा स्हेदा खाल्से मेटाप लाबारी खाम्ला ?

थेराङबान बोरी दोगासी जिन्बा चाँदनी विवाह लाबारी दिङ छयोसाइ आछ्योसाइ ह्राङला फिरि मुबा ज्योज्यो बिमा ङहाँच्छा दीपेन्द्रसे विवाह लाला । खाराङबा लक्की चाँदनी मोक्तान ? शायद, चुराङबा मौकाजा च्याङनादा जे खाला ताला । तिल्दाबिसाम चाँदनीला चाहनाई ज्याबा, मिनअे ज्याबा ओम् म्हिअेन जेबा । चु बिमा स्ह्यान तिला तोजी ? कोई-कोइला भाग्य तेन् संयोगअे खाराङबा खाबा ? कलाकार चाँदनी मोक्तान नेपाली फिल्म 'नौ डाँडा पारि' ला शुटिङ जिन्सी टिबा मुबा । खालाङसे-खालाङसे तेमालला दीपेन्द्र दोङसे तिरेकुनु सुटुक्क चाँदनीदा ह्रुप तानिजिम । बौद्धिकरी ट्यालेन्ट दीपेन्द्रइनोन चाँदनी बिमा कम्ती आरेबा । जाजा मुमा ह्यान्देन् पढाइरी सिपालु दीपेन्द्र दोङसे याम्बुला असनरी मुबा अन्नपूर्ण मा.वि.री डोमा ह्यान्देन् पढाईला छ्यामरी ल्होलो-ल्होलो अतिरिक्त विषयरीक्यार ब्रिगु स्याङसी खाबा मुबा ।

दाते तिला लाबा मुलोम चाँदनी तेन दीपेन्द्र ?

दाते पाङनोन तोमा दीपेन्द्र तेन चाँदनी याम्बुला जोरपाटी नयाँबस्तीरी मुबा ह्राङलान धिमरी मुला । चाँदनी मोक्तानला धिमरीन गोर्की कोल्ड स्टोर मुला । ह्राङला तिङला टुक्रा जामे 'दीचा' दा स्याहार लाबान फाल्टो धुइजा कलाकारितारीन पिन्सी टिबा मुला । दाते जापानीज प्रोजेक्टरी स्होबा नेपाली फिल्म 'कठपुतली' री अभिनय लासी टिबा चाँदनी मोक्तानला स्ह्यान धुइकादे दीपेन्द्रतेन नोन विताप तासी टिबा मुला ।

दारेम पालो खाजी दीपेन्द्र दोङला । दातेदोनामा खाबाइबिभा ल्हामा ह्वाई ब्रिभा म्हि ताबासे लामा खाल्दामानसेन एल्वम तेसाइनोन ह्वाइला छिगजा दीपेन्द्रलान दाम्ला । पाङनोन तोमा दाते थेदा ह्वाई ब्रिभारी फुर्सदनोन आरे विसाई ताला । तिल्दाबिसाम थे ह्वाइ ब्रिभा म्हिजे आहिननाम म्हेतोगी सक्रिय तामाङ सञ्चारकर्मीअेनोन हिन्ना । प्रत्येक सोमबार इमेज एफ.एम. ओम प्रत्येक मंगलबार गोर्खा एफ.एम. री गेताङ स्हेङसी खाबा दीपेन्द्र दोङला फुर्सदला दुइकादेजा बिसाम ह्वाइ ब्रिभारी निसी टिबा मुला ।

प्रस्तुति: सिनेम्हेन्दो