मायाला छो, 'च्याङबा' तेन 'दुःङाल' ह्राङ्बा तामाङ ग्योइला फिल्मकादेरीक्यार लिड नृत्य तेन सहायक नृत्य निर्देशक दोसी ह्राङला प्रतिभाग्याम फिल्म थुमरी ह्रो लासी खाबा म्हेतोगी उत्साही प्रतिभाला मिन हिन्ना कलाकार बद्री थिङ । जाजा मुमा पढाइ तेन खेलाडी दोबा लक्ष्य थोसाइ टेलिभिजनरी खाबा गेताङ जुकुसे प्रभावित तासी थे कला थुमरी वाङबा हिन्ना ।

पेबा स्वभाव, च्याङनाजे ताम पाङबा तर ताम बिमा ल्हामा गे लासी ओन्बा, याम्बुला भिडभाड बिमाइनोन नाम्साला शान्त वातावरणरी टिसी तिलाई लाबा सेम थोबा नृत्य कलाकार वद्री थिङला केवा २०४३ सालला कार्तिक ३० गते काभ्रे जोङरी मुबा रयाले गा.वि.स. वडा नं. ४, खानीखोलारी मुबा आस्याङला दिमरी आपा केदारमान तामाङ थिङ तेन आमा सुकुमाया गोलेला कुग्याम ताबा हिन्ना । दिम थेमेरी आपा-आमा, म्हेमे-माम ओम छ्यामरी आले ङ्ही मुला । ललितपुर फेदीखोला लामाटार-९ री स्थाई दिम तासी दाते ललितपुरला ग्वार्कोरी मुबा आँगन प्रतिभा प्रतिष्ठान मिनला डान्स कल्चर सेन्टररी २०६० सालहयान्दे डान्स लोपसी थेनोन प्रतिष्ठानरी नृत्य प्रशिक्षक दोबा कलाकार बद्रीसे नाम्साला ल्हामान युवाकादेदा नृत्य लोप्सी जिन्बा मुला ।

तिलाइ म्युजिक भिडियोरीनोन क्लाङबा अबसर याङबा थेसे ल्हामान स्टेज प्रोग्राम जुकुरीक्यार ह्राङसे नृत्य निर्देशक दोसी गे लासी जिन्बा मुला । अन्दाजी ५ फिट ५ इन्च नोबा बद्रीसे स्थानीय स्तररी मुबा लोपखाङग्याम्से लोपखाङ स्तरला शिक्षा किन्सी कलाकारितारी वाङबा हिन्ना । ह्राङला कला म्राङसी ल्होलोल्होलो संघ संस्थाकादेग्याम्से दाङबा सांगीतिक गेताङ ओम तिलाइ फुर्सदला दुइकादेजा म्हिकादेदान स्याबा लोप्सीन निबा मुला । बिसाम ह्राङला लेङबा दुइकादेजा दिमरी मुबा पसलरीन टिसी तिलाई व्यापार व्यवसाय लासी खाबा मुला ।
प्रस्तुतिः सिनेम्हेन्दो