तामाङ फिल्म दुनियाँमा एक्शन नायकको अभाव रहेको वेला अहिले आएर एकाएक नयाँ कलाकार अमिर दोङको अभिनय प्रस्तुतीलाई सवैले मन पराउन थालेका छन् । आफ्नै मौलिक एवं नेचुरल अभिनय गर्न सिपालु युवा नायक तथा कलाकार अमिर दोङ 'लेङस्याला सेमजो' नामक फिल्मवाट दर्शकहरुमाझ हुत्तिएर आएका हुन् ।

फिल्म क्षेत्रमा आउनु भन्दा अगाडि नृत्य विधामा राम्रो दक्षता हासिल गरेको उनी एउटा साधारण थाङ्का कलाकार थिए । काठमाण्डौको कमलादीमा अवस्थित साधना कलाकेन्द्रमा नृत्य सिकेको बताउने उनको अधिकांश समय नृत्य सिक्न र सिकाउनमै व्यस्त रहयो । बचेको बाँकी समयमा भने उनी आफूले जानेको थाङ्का लेख्ने गर्थ्यो ।

५ फिट ७ इन्च अग्लो उनी तिमालवाट औपचारिक स्कूले शिक्षा पूरा गरेर काठमाण्डौ आउदा यसरी फिल्मको नायक बन्छु भन्ने सपनामै सोँचेको थिएन । काठमाण्डौमा अधिकांश तामाङ युवाहरुको मुख्य पेशा भनेकै थाङ्का लेख्नु थियो कि त होटेल रेष्टुरामा वेटर, मोटरगाडी सिक्ने, चलाउने तथा सिजनमा भारी बोकेर ट्रेकिङ गर्न बाध्य हुनुपर्थ्यो । हुन त अहिले पनि स्थिति त्यस्तै रहेपनि कतिपय धेरै तामाङ युवाहरुले तामाङ समाजको इज्जत वढाउने कलाकारिता एवं विभिन्न क्षेत्रवाट नाम र दाम दुवै कमाइरहेका छन् । त्यसो त अमिर दोङले 'लेङस्याला सेमजो' पछि तुरुन्तै आमाला माया मा कडा एक्सनमा अभिनय गर्नु उनको अभिनयको प्रगति र कलाकारितामा निरन्तरताको संकेत देखिन्छ । हेर्दा भलादमी र हयाण्डसम उनी वढता हाँसिलो स्वभावको देखिन्छ । किनभने फिल्मको पर्दामा आउनुपर्ने स्क्रीन फेश उनीमा छ । सिनेम्हेन्दो सँगको पहिलो भेटमा विवाह नभएको वताउने उनी अहिले साँच्चिकै खासक खुसुक लासकलुसुक प्रेम विवाहमा बाँधिएको समेत थाहा लाग्यो । हुन त घरजम गर्ने मौकालाई पनि छोड्नु हुन्न अधिकांश तामाङ फिल्मका कलाकारहरुले १-२ वटा फिल्महरुमा खेल्न थाल्दै विवाह गरेको उदाहरण हामीमाझ नभएको पनि होइन ।

विवाहको कुरो छोडौ अमिरको घरगाउँको अलिकति परिचय दिनुपर्दा उनको जन्म वि.सं. २०४१ साल असोज २६ गते वुत्रवार हालको मंगलटार गा.वि.स. पिन्थिली -९ तिमाल काभ्रेमा आपा उत्तर दोङ तथा आमा असली थोकरको कोखवाट भएको हो । 'ङातेन प्रे' लगाएत अन्य म्यूजिक भिडियोमा समेत अभिनय गर्न भ्याईसकेको उनको सिर्जनात्मक अभिनय यात्रा र उनको एक्शन भूमिकालाई सबैले मन पराउन थालेको छ । धेरै तामाङ फिल्म तथा नेपाली फिल्महरुमा द्वन्द निर्देशन गरिसकेको फाइट मास्टर जनक गुरुङले समेत युवा कलाकार अमिर दोङको कलाकारिताको प्रशंशा गरेको पाइएको छ ।